Ерөнхий сайд Л.Оюун-Эрдэнийн захирамжаар Хөдөлмөр, нийгмийн хамгааллын сайд Т.Аюурсайханыг үүрэгт ажлаас нь чөлөөллөө. 

Тэрээр Нүүрсний хулгайн хэрэгт нэр холбогдож, Авлигатай тэмцэх газарт шалгуулж байгаа юм.

Өнгөрсөн нэгдүгээр сарын сүүлээр УИХ-ын гишүүн Т.Аюурсайхан нь сайдын болон УИХ-ын гишүүний бүрэн эрхээсээ чөлөөлөгдөх хүсэлтийг гаргасан. Энэ асуудлыг Ерөнхий сайд болон Засгийн газрын хэрэг эрхлэх газрын дарга нар хаврын чуулган эхэлсэн даруйд хэлэлцэн шийдвэрлэнэ гэж мэдэгдэж байсан.

Тиймээс өнөөдрийн Засгийн газрын хуралдаанаар түүний хүсэлтийг хүлээн авч шийдвэрлэлээ. 

Өнөөдөр УИХ-ын хаврын чуулган нээлтээ хийсэн. Чуулганы хуралдаанаар УИХ-ын гишүүн Т.Аюурсайханы гишүүнээс чөлөөлөгдөх асуудлыг хэлэлцэнэ.

Дашрамд, Авлигатай тэмцэх газраас нүүрсний хэрэгт холбогдуулан УИХ-ын гишүүн Т.Аюурсайхан, Н.Наранбаатар, Д.Бат-Эрдэнэ нарын бүрэн эрхийг түдгэлзүүлэх хүсэлтийг Улсын ерөнхий прокурорт гаргана гэдгээ мэдэгдсэн билээ.