Иргэн Д.Мөнх-Эрдэнэд холбогдох хэргийн шүүх хурал дахин хойшилж таслан сэрийлэх арга хэмжээг хэвээр үлдээлээ. Шүүх хурлыг дөрөвдүгээр сарын 2-ны өдөр товложээ.
Өмгөөлөгчийн зүгээс түүнд оноосон таслан сэргийлэх арга хэмжээг гурван үндэслэлээр өөрчлүүлэх хүсэлт тавьсан ч шүүх татгалзсаар байна. Иргэн Д.Мөнх-Эрдэнэ нь МУИС-д суралцдаг, мөн өөрийн биеийн хүнд шалтгаанаар 461 дүгээр хорих ангид эмчлүүлж байсан, мөн түүний төрсөн аавын биеийн байдал нь хүнд, хагалгаанд орсон, уулзах хүсэлт тавьсан ч шүүх татгалзсан юм.
Өнөөдрийн шүүх хуралдаан дээр хагалгаанд ороод удаагүй аав нь ирсэн бөгөөд хүүтэйгээ уулзаж, золгохыг хүссэн ч уулзуулаагүй байна.
Шүүх хуралдааны үеэр иргэн Д.Мөнх-Эрдэнэ "Аавтайгаа уулзах боломжоор хангаж өгнө үү гэж чин сэтгэлээсээ хүсэж байна. Цагдан хорих арга хэмжээг өөрчилж, батлах даалтад гаргаж өгнө үү" хэмээн хүссэн юм.
Түүнийг хэрэгт холбогдуулан шалгаж байгаа үндэслэл нь цагдан хорих шаардлага байхгүй зүйл анги, хөнгөн гэмт хэрэгт тооцогддог хэмээн өмгөөлөгч нь онцолж байна.
Мөн өнөөдрийн шүүх хуралдааны үеэр иргэд жагсаал хийж, түүнийг суллахыг шаардаж байсан юм.
