Улс орны эдийн засаг, нийгмийн тулгамдсан асуудлыг иргэдтэйгээ хамтран тодорхойлж, шийдвэрлэх “Зөвлөлдөж шийдье” зөвлөлдөх санал асуулгын хоёрдугаар үе шатны санал асуулга маргааш Төрийн ордонд эхлэх гэж байна. Үүнтэй холбогдуулан зөвлөлдөх санал асуулгын үйл ажиллагаанд дэмжлэг үзүүлэх УИХ-ын Ажлын хэсэг, Зөвлөлдөх зөвлөл, Үндэсний статистикийн хорооны төлөөлөл мэдээлэл өглөө. 

Энэ үеэр УИХ-ын гишүүн Д.Тогтохсүрэн, С.Одонтуяа, Т.Доржханд мөн мэдээлэл өглөө.

ХҮН-ын бүлгийн дарга, УИХ-ын гишүүн Т.Доржханд "Шинэ Үндсэн хуулийн асуудлыг огт гаргаж ирээгүй бөгөөд өнөөгийн зохицуулалтаар хийх боломжгүй. Хоёрхон тохиолдолд буюу хувьсгал, үймээн самуун гарсан үед эсвэл засаглал солигдох үед боломжтой. 

Гэхдээ Монгол Улсад хувьсгал, үймээн самуун гарахыг аль ч улс төрийн намынхан хүсэхгүй. Бид ямар Африк, Латин Америкийн орон байгаа биш. Мөн хэрэв манай улс хаант засаглалтай, эсвэл ерөнхийлөгчийн засаглалтай болсон үед Шинэ Үндсэн хуулийн асуудал яригдана. 

Тусгаар Монгол Улс ардчиллаа бэхжүүлээд явна гэвэл парламентын засаглалаа сайжруулахаас өөр аргагүй. Нэг хүний, нэг намын засаглалд орохоос бид зайлсхийх ёстой. 

Тэр агуулгаараа бид Шинэ Үндсэн хууль биш, харин тогтолцоогоо тордоод сайжруулаад явах шаардлагатай. Энэ хүрээнд манай нам Үндсэн хуульд нэмэлт өөрчлөлт хийх нь зүйтэй гэдэг агуулгаар сүүлийн хоёр жил идэвхтэй ажилласан. 100,000 гаруй иргэнээс гарын үсэг цуглуулж, 21 аймаг, есөн дүүрэг, 330 сумаар мэдээллээ тарааж байгаа. 

Үндсэн хуулийн нэмэлт өөрчлөлтөөр эдийн засгийн хараат байдлаа сайжруулъя, сонгуулийн тогтолцоо, парламентын ардчиллаа бэхжүүлье гэдэг талаар иргэдэд мэдээлэл хүргэсэн. Тэд таатай хүлээж авдаг. Өөрөөр хэлбэл, иргэдийн хүсээд байгаа зүйл нь өөрчлөөд өгөөч ээ гээд байгаа юм. 

Зөвлөлдөх уулзалтад манай нам ажиглагчаар оролцоно. Шаардлагатай тохиолдолд асуулт асуугаад дотор нь оролцоод явна. Санал асуулгын ажлын хэсгээс дүн мэдээг нэгтгээд яаралтай УИХ-д өгөөрэй" гэв.