Улс орны эдийн засаг, нийгмийн тулгамдсан асуудлыг иргэдтэйгээ хамтран тодорхойлж, шийдвэрлэх “Зөвлөлдөж шийдье” зөвлөлдөх санал асуулгын хоёрдугаар үе шатны санал асуулга маргааш Төрийн ордонд эхлэх гэж байна. Үүнтэй холбогдуулан зөвлөлдөх санал асуулгын үйл ажиллагаанд дэмжлэг үзүүлэх УИХ-ын Ажлын хэсэг, Зөвлөлдөх зөвлөл, Үндэсний статистикийн хорооны төлөөлөл мэдээлэл өглөө. 

Энэ үеэр УИХ-ын гишүүн Д.Тогтохсүрэн, С.Одонтуяа, Т.Доржханд мөн мэдээлэл өглөө.

УИХ-ын гишүүн С.Одонтуяа "Шинэ Үндсэн хуулийг миний бие болоод АН-ын гишүүд дэмжихгүй. Цаг хугацааны хувьд тохиромжтой бус мөн хэлэлцэж, дэмжиж болохооргүй маш олон хуулийн заалт орсон байна.

Зөвлөлдөх санал асуулгын хариу нь "Улс төрийн систем чинь болохгүй байна" гэж байгаа бол тогтолцоогоо өөрчилье. "Эдийн засаг, бизнесийн эрх чөлөө алга боллоо үүнийг өөрчилмөөр байна" гэвэл бид хийе. Иймээс ард түмний хүсэн хүлээсэн зүйлийг өөрчлөхийн тулд Зөвлөлдөх зөвлөлийн ажлыг үр дүнтэй болгох нь туйлын чухал байна.

Ойрын хугацаанд тулгамдаж буй асуудал бол Сонгуулийн тухай хууль, Улс төрийн намын тухай хууль юм. Судалгааны үр дүнгээс харахад ард иргэд улс төржилт, намчирхсан байдлаас залхжээ. Тиймээс бид реформын шинж чанартай, шинэ хуулиудыг санаачлах ёстой.

Үндсэн хуулийн нэмэлт өөрчлөлт яригдах тохиолдолд зөвхөн парламентын ардчиллыг боловсронгуй болгох, төгөлдөржүүлэх асуудалд ажиллахад бэлэн байна" гэлээ.