Л.Гантөмөрийг Ардчилсан намын даргаар бүртгүүлэх тухай Ч.Өнөрбаяр, Л.Гантөмөр нарын өргөдлийг өнөөдөр УДШ-ийн нийт шүүгчдийн хуралдаанаар хэлэлцэн шийдвэрлэжээ. Ингэхдээ Д.Ганбатыг Ардчилсан намын даргаар бүртгүүлэх тухай С.Эрдэнийн өргөдлийг ч бас хамтад нь хэлэлцсэн байна. Өнөөдрийн хуралдаанаас Улсын дээд шүүх Л.Гантөмөрийг АН-ын даргаар бүртгэжээ.

Сануулахад, өнгөрөгч нэгдүгээр сарын 19-нд хуралдсан АН-ын ҮБХ-ны ээлжит бус хуралдаанаар АН-ын даргыг сонгох сонгуулийг явуулж, Сангийн сайд асан С.Баярцогт, БСШУ-ы сайд асан Л.Гантөмөр, УИХ-ын гишүүн асан З.Нарантуяа нар өрсөлдөж, Л.Гантөмөр эхний санал хураалтаар олонхийн /50,6 хувь/ санал аван АН-ын даргаар сонгогдсон юм. Мөн өдөр АН-ын Их хурал хуралдаж Л.Гантөмөрийг намын даргаар батламжилсан юм.

АН 2020 оны УИХ-ын сонгуулиас хойш албан ёсоор намын даргагүй явж ирсэн бөгөөд сүүлийн гурван удаагийн сонгуульд АН-ын ерөнхий нарийн бичгийн дарга намаа төлөөлөн СЕХ-нд нэр дэвшигчдээ, намаа бүртгүүлж ирсэн. Харин өнөөдөр Дээд шүүхийн нийт шүүгчдийн хуралдаанаас гаргасан шийдвэрээр АН гурван жилийн дараа албан ёсоор намын даргатай болж байна.