Ардчилсан Намын ҮБХ-ны ээлжит бус хурал өнөөдөр болж байна. Өнөөдрийн хурлаар АН-ын даргыг сонгох юм.
Намын даргад нэр дэвшигч нар мөрийн хөтөлбөрөө танилцуулж дууслаа. Энэ үеэр намын даргад нэр дэвшигчийн үнэмлэхээ аваад байсан УИХ-ын гишүүн С.Одонтуяа нэрээ татаж байгаагаа мэдэгдэв.
Тэрээр "Намын нэгдэлд гагнаас, эвийн цавуу болж эвлэрлийн явцыг гүйцээхийн төлөө чадах бүхнээ хийх, оролцоход бэлэн гэдгээ урьдын адил илэрхийлэх байна. Тийм ч учраас эвлэрэлийн гүүр болж, хуулийн шаардлага хангах хүртэл намын түр дарга хийж, ойлголцлыг урагшлуулах санал ч гаргаж байсан удаатай. Өнөөдрийн хурал нэгдэх нягтрах хүсэл, агуулгаар дүүрэн байх ёстой.
Цаашдаа олон шалтгааны улмаас өнөөдрийн хуралд ирж чадаагүй журмын нөхөд, талцсан бүлэг фракцуудын эвийг гагнахад үйл ажиллагаагаа чиглүүлэх нь үр дүнтэй гэж үзэж байна. Намын жирийн гишүүдийн тодорхой дэмжлэгийг хүлээж байгаа Х.Баттулга, С.Эрдэнэ нарын тэргүүтэй журмын нөхөдтэй ч учир зүйгээ ололцож, цаашдаа нэгэн дээвэр дор хамтдаа нэгдэж, бие биетэйгээ биш Монголын Ардчиллын төлөө тэмцэх ёстой.
Надад улс төрийн А үсгээс эхлэн зааж Баянгол дүүргийг танигдахын аргагүй өөрчилж, шинэчилж чадсан Ардчилалынхаа төлөө 33 жил өдөр шөнөгүй цогтой тэмцсэн Ардчилалын маань бас нэгэн тод өнгө болсон С.Эрдэнэ даргатайгаа хамтраад, нэгдээд явах туйлын хүсэл сэтгэлийн минь гүнд үргэлж байдаг" гэлээ.
