Ардчилсан намын Үндэсний бодлогын хорооны ээлжит бус хурал 2023 нэгдүгээр сарын 13-ны өдөр "ТУУШИН" зочид буудлын "СОЁМБО" танхимд болох гэж байна. Энэ үйл явдалтай холбогдуулан Ардчилсан намын ҮБХ-ны гишүүн, эдийн засагч М.Чимэддорж намын гишүүддээ хандан ил захидал илгээжээ. 

Захидалд,

"Улс орныхоо хөгжил дэвшил, тусгаар тогтнолоо баталгаажуулах их үйлсийн төлөө олон арван жил хоёргүй сэтгэлээр зүтгэсэн, зүтгэж яваа Ардчилсан намын нөхөддөө, намын өнөөгийн нөхцөл байдлыг шийдвэрлэх их эвлэрэлийн төлөө түүчээлж яваа намынхан ҮБХ-ны гишүүдэд хандаж сэтгэлийнхээ гүнээс ундран гарсан цөөн хэдэн үгээр уриалга дэвшүүлье. Хүлээн авна уу.

Өнөөгийн эгзэгтэй цаг үед улс төрийг хамгийн чухал байж болох ганц өнцгөөс тайлбарлаваас: Улс төр бол харилцан буулт хийх урлаг юм. Хэрэв ойлголцож, зөвшилцөж, буулт хийж эс чадваас салан одох, хүчээр асуудлаа шийдэх хоёрхон зам үлдэнэ. Намын дотоодод үүсээд байгаа асуудлыг нэгэнт хүчээр шийдэх боломж үгүй тул салан одох ганц зам л үлдэнэ. Буулт хийж чаддаггүй хөндлөн хэвтээд байгаа хэн ч байлаа асуудлыг хүчээр шийдэх хандлагатай хүн юм. Тийм хүн төрийн эрхэнд гарвал хүний эрх чөлөө, ардчилсан тогтолцоог устгана гэсэн үг. Дахин сайтар болгооно уу.

Эвийг эрхэмлэхийн эхний алхам нь бусдадаа үл мартагдах муу үгийг хэлэхийг тэвчихээс эхэлнэ. Аливаа асуудлаар санал зөрүүтэй, бусдаасаа ялгаатай байр суурьтай байж болно. Энэ нь тэр хүний итгэл үнэмшил, эрх ашгийн алинаас ч шалтгаалж болно. Гэвч энэ нь хүний адаг гэсэн үг биш. Хөрөнгө чинээнээс нь, хүйсээс нь, хөгшин залуугаас нь болоод байгаа юм биш. Субьектив үг хэлэхээс татгалзая.

Дэвшүүлсэн санал, байр суурь нь бусдын эрүүл саруул шүүмжээр, эсвэл олонхийн саналаар няцаагдаж болно. Энэ нь тэр хүнийг муу ч хүн болгохгүй, сайн ч хүн болгохгүй. Бас ялагдагч ч болгохгүй. Харин өөр бодолтой цөөнхийн нэг болгоно. Үүнийг хүлээн зөвшөөрөөд олонхын саналаа дагаад явах, аль эсвэл энэ олонхиос өөр олонхийг сонгоод явах, тэр ч бүү хэл өөрийн олонлогио бий болгоод явах эрхийг нь хориогүй юм. Тиймээс ардчиллын энэхүү суурь дүрмийг ухамсарлаж цөөнх болсон тохиолдолд өөрийн сонголтоо хийх нь зөв юм шүү.

Оюун бодлоо уралдуулан байж хүрсэн дүгнэлт, санал чинь олонхийн саналаар дэмжигдэн баталгаажиж байгаа бол асуудлыг шийдвэрлэхэд олонхи л болгож байгаа юм шүү. Хожмын өдөр эргээд харахад буруу зүйлд санал нэгдсэн ч байж болно. Үүнийг цэргийн хэлээр бол фронтод илүүрхээд дайнд ялагдав хэмээдэг. Энэ учир шалтгааныг дахин нэг санаж цөөнхийнхөө байр суурь, үзэл бодлыг анхааран сонсож олуулаа гэдэг нь зөв биш байж болохыг дахин нэг тунгаахыг хүсье.

Нэгтгэвээс, хувь хүнрүү муйхарлан дайрахгүйгээр асуудлынхаа гүнд шумбан орцгооё. Харилцан буулт хийж олонхийн саналаар асуудлаа шийдье. Олонхи нь олуулаа шүү гэж цөөнхөө нүд үзүүрлэхгүй, цөөнх нь ялагдал гэж гомдохгүй хамтдаа урагшилцгаая.

Та бүхний мэргэн оюунаар шүүгдсэн шийдэл, шийдвэр Ардчилсан Намын сэргэлтийн эхний цэг байх болно" гэсэн байна.