Засгийн газрын хуралдаанаас гаргасан шийдвэрийг танилцууллаа. 

Энэ үеэр Сангийн сайд Б.Жавхлан "2022 оны төсөв Монгол Улсын төсвийн тэнцэл сайжирч гарсан. Өөрөөр хэлбэл 1.4 их наяд төгрөгөөр Улсын төсвийн тэнцэл сайжирч гарлаа.  

Экспортын дүнгийн хувьд урьд өмнө нь хүрч байгаагүй 12.5 тэрбум ам.долларын экспортыг хийж чадлаа. Импорт тодорхой хэмжээгээр нэмэгдсэн хэдий ч зөрүү нь 3.8 тэрбум ам.доллар буюу худалдааны тэнцэл сайжирч гарсан. Энэ нь 2022 оны төсвийн алдагдлыг бууруулахад гол нөлөө үзүүлсэн.

Экспорт дотор биет хэмжээгээрээ хамгийн том нь нүүрсний экспорт байдаг. Өнгөрсөн оны тавдугаар сард төсвийн тодотгол хийх үеэр нүүрсний экспортыг 18 сая тонн байна гэж тодотгол хийж байсан.

Тэгвэл 2022 оны арванхоёрдугаар сарын 31-ний байдлаар 31.7 сая тонн нүүрс экспортолж чаджээ. Энэ нь төсвийн орлого, валютын орлого нэмэгдэхэд гол үзүүлэлт боллоо" гэв

Мөн тэрээр Оюутолгойн далд уурхайн үйл ажиллагааны талаар "2023 оны дөрөвдүгээр сараас далд уурхайг эхлүүлэх зорилготой байгаа. Би өчигдөр холбогдох хүмүүстэй нь уулзсан. Гэхдээ далд уурхайг 2023 онд эхлүүлсэн ч орлого өм цөм орж ирэхгүй. Оюутолгойн далд уурхайгаас орлого олох оргил үе нь 2028 оноос эхэлж байгаа. Харин 2024-2026 онуудад үе шаттайгаар орлогын хэмжээ нэмэгдээд явах юм. Бид үүнийг тэсэн ядан хүлээж байгаа" гэлээ.