“Нийгэм, улс төр, эдийн засагт тулгамдсан асуудал, гарц шийдэл” сэдэвт эрдэм шинжилгээний хурал Төрийн ордонд болов. 

Хуралд Засгийн газрын хэрэг эрхлэх газрын дарга Д.Амарбаясгалан, УИХ-ын гишүүд, эрдэмтэн судлаачид оролцжээ.

Хурлын эхэнд УИХ-ын дарга Г.Занданшатар үг хэллээ.

Тэрээр "Дэлхийн улс төр, эдийн засагт тектоник шилжилт үүсээд байгаа энэ цаг үед гадаад, дотоод олон нөхцөл байдлын улмаас багагүй сорилт бэрхшээл тулгарсан нэгэн оныг үдэж, шинэ 2023 онтой золголоо. Бэрхшээл сорилт нэг талаас шинэ боломж болж, цаг алдалгүй ашиглаж, ирээдүйг харсан шинэ алхмуудыг заавал хийх түүхэн цаг үе тохиогоод байна. Улс орны хэмжээнд нэн тулгамдсан асуудлуудыг тодорхойлох, оновчтой шийдэл олж, гарц гаргалгааг олохоор зөвлөлдөх санал асуулгыг зохион байгуулахаар УИХ тогтоол гаргасан. Үүний тулд эрдэмтэн судлаачид, иргэний нийгмийн байгууллагууд, улс төр, бизнес, эдийн засгийн хүрээнийхэнтэй асуудлыг шүүн хэлэлцэх нь зүйтэй.

Улс төр, засаглалын тогтолцооны гажуудал, төрийн албаны чадавхын сулрал, албан хаагчдын хариуцлага, ёсзүйн доройтол нийгмийг хамарсан эмзэг асуудал болоод байна. Баялгийн хулгай, авлига, албан тушаалын гэмт хэрэг, нийгмийн тэгш бус байдал, орлого амьдралын эрс ялгаа, ажилгүйдэл, ядуурал иргэдийг бухимдуулж байна. Эдийн засгийн оновчгүй бодлого, хэт төвлөрөл, орчны бохирдол, түгжрэл гэх мэт олон жил хуримтлагдсан асуудлуудыг засаж сайжрулах цаг нэгэнт болсон.  Хөгжлийг гацааж, ирээдүйг сүүдэртүүлж, иргэдийг бухимдуулж байгаа гаж үзэгдлүүдийг цэвэрлэхгүйгээр цаашаа явахгүй” гэдгийг хэллээ.

Харин ЗГХЭГ-ын дарга Д.Амарбаясгалан "Шилжилтийн үед эрх мэдэл, мэдээлэлд ойрхон байсан хэдхэн хүний гарт нийгмийн баялаг шударга бусаар төвлөрч, уул уурхай тойрсон улс төр, хууль хяналтын байгууллага, эдийн засгийн бүлэглэл бий болж, орлогын тэгш бус байдал гүнзгийрч, хэт тогтворгүй засаглал үүсэж, урт хугацааны хөгжлийн бодлого алдагдаж, авлига хээл хахууль бүх шатанд гүнзгийрсэн байна.

Ардчилсан засаглалын гажуудал, төрийн эрх мэдлийн хуваарилалт, хууль тогтоох, гүйцэтгэх эрх мэдлийн харилцан хяналтгүй байдал нь өнөөдрийн нийгмийг бүтээсэнийг бид хүлээн зөвшөөрөх ёстой.

Нийгэм, эдийн засгийн хөдөлгөгч хүч болж, төрд дуу хоолойгоо хүргэж, эрх ашгаа хамгаалдаг нийгмийн хамгийн хариуцлагатай хэсэг болох дундаж давхарга улам бүр нимгэрч, орлогын тэгш бус байдал гүнзгийрч, баян ядуугийн ялгаа улам нэмэгдсээр байна.

Манай улсын нийт хүн амын 1/3 нь ядууралд нэрвэгдэж, дундажаас доогуур давхарга нийт хүн амын 70 хувийг бүрдүүлж байна. Хадгаламж эзэмшигчдийн ердөө 3 хувь нь нийт хадгаламжийн 75 хувийг эзэмшдэг болжээ. Өндөр орлоготой иргэдийн хэрэглээ бага орлоготой иргэдийнхээс 5 дахин өндөр байна" гэлээ.