МАН-ын Удирдах зөвлөлийн хурал өнөөдөр болж, зарим яамны сайд нарыг шинээр томилох асуудлыг хэлэлцэж байна. Хурлаас гарсан шийдвэрийн талаар МАН-ын Нарийн бичгийн дарга А.Ариунзаяа сэтгүүлчдэд мэдээлэл өглөө. 

Тэрээр “Хуулиар Шадар сайдын статус нь Эдийн засаг, хөгжлийн сайдын статустай болж байгаа. Ч.Хүрэлбаатарыг Шадар сайд буюу Эдийн засаг, хөгжлийн сайдаар томилохыг дэмжлээ.

Үүнээс гадна,

• Эрүүл мэндийн сайд С.Энхболдыг дэд сайдаар, С.Чинзориг гишүүнийг Эрүүл мэндийн сайдад дэвшүүлсэн. Тэрээр Хөдөлмөр халамж, эрүүл мэндийн даатгалтай холбоотой асуудлуудад хамгийн туршлагатай тул дэвшүүлж байна. 

• Барилга хот байгуулалтын сайдаар Ц.Даваасүрэнг дэвшүүлсэн.

• Боомтын сэргэлтийн сайдаар Х.Булгантуяаг дэвшүүлсэн. Тэрээр Сангийн дэд сайдаар ажиллаж байхдаа боомтын хөгжлийн асуудлыг хариуцаж байсан. 

• Байгаль орчин, аялал жуулчлалын дэд сайдаар “Таван толгой түлш” компанийн захирлаар ажиллаж байсан М.Ганбаатарыг,

• Байгаль орчин, аялал жуулчлалын дэд сайдаар ажиллаж байгаа Г.Түвдэндоржийг Эдийн засаг, хөгжлийн яамны дэд сайдаар,

• Цахим хөгжил, харилцаа холбооны дэд сайдаар хуульч Ж.Эрхэмбаатарыг,

• УУХҮ-ийн дэд сайдад Б.Цэндсүрэнг дэвшүүлэв. Тэрээр энэ салбарт олон жил ажилласан туршлагатай" гэлээ.

Засгийн газар өнөөдөр ээлжит бусаар хуралдаж, дээрх сайд нарыг томилох аж.