УИХ дахь Ардчилсан намын бүлгийн санаачилгаар байгуулагдсан намын эв нэгдлийг хангах ажлын хэсгийн хоёр дахь удаагийн хурал Төрийн ордонд өнөөдөр хуралдлаа.
Ажлын хэсгийн анхны хуралдаанаас хойш ардчилсан намын шат шатны сонгуульт гишүүд, анхан шатны олон гишүүд намын эв нэгдлийг дэмжиж байгаагаа илэрхийлсээр байгаа ажээ.
Түүнчлэн намын эв нэгдлийн асуудлыг УИХ дахь Ардчилсан Намын бүлэг манлайлан ажиллаж буйг тус намын гишүүд талархан хүлээж авч байгаа юм.
Энэ удаагийн хурлаар ажлын хэсгийн ажиллах журмыг баталж цаашид намын эв нэгдлийг хангах чиглэлээр ажиллах чиглэлүүдээ тодорхойлон, ажлын хэсгийн гишүүдийг зохион байгуулалтад оруулж дараах гурван чиглэлээр дэд ажлын хэсэг байгуулжээ.
- Улс төрийн намын тухай хууль, Ардчилсан Намын үндсэн дүрэмд нийцүүлэн эрх зүйн маргааныг эцэслэх асуудлыг хариуцсан;
- Хоёр дахь дэд ажлын хэсэг нь Ардчилсан намын эв нэгдлийг хангах, намын бүх шатны гишүүдийг намын эв нэгдлийг хангах зөвшилцөлд оролцуулах зохион байгуулалтыг хариуцсан;
- Ардчилсан намын эв нэгдлийг хангах ажлын хэсгээс гарсан зөвлөмж болон түүний мөрөөр авч хэрэгжүүлж буй арга хэмжээ, үр дүнгийн талаар тэнцвэртэй мэдээлэл өгөх зорилготой олон нийттэй харилцах асуудал хариуцсан байна.
Намын эв нэгдлийг хангах ажлын хэсэг нь намын өмнө тулгамдаад байгаа асуудлыг зөвшилцлийн зарчмаар асуудлаа шийдвэрлэхээр тогтсон бөгөөд цаашид намын асуудлаар санал гаргах, хэлэлцэх асуудалд намын гишүүдэд нээлттэй байхаар тогтсон байна.
