Нүүрсний хулгайн хэргээр АТГ-т шалгагдаж экс Ерөнхийлөгч Х.Баттулга хил даван зугтсан тухай Эдийн засгийн хөгжлийн сайд Ч.Хүрэлбаатарын жиргээ өчигдөр цахим орчинд багагүй шуугиан тарив. Ч.Хүрэлбаатар сайд энэ тухай "Х.Баттулга өнөөдөр өглөө 10 цагийн үед хилээр даван зугтжээ. Албаны хүмүүсээс тодрууллаа, үнэн гэнэ. АТГ-д байцаалт өгч байна л гэсэн, яллагдагчаар татагдлаа л гэсэн. Нүүрсний хулгайн хэрэг? Хөгжлийн банкны хэрэг? Төмөр замын хэрэг? Энэ бүгд яах вэ?" хэмээн өчигдөр оройн 17.00 цагийн орчимд жиргэнэсэн байна. Гэвч өнөөдөр өглөө АТГ-ын албаны эх сурвалжийн өгсөн мэдээлэлд "Ерөнхийлөгч асан Х.Баттулга зугтаагүй. Хувийн баталгаа гаргаад БНСУ-д биеэ эмчлүүлэхээр явсан. Төлөвлөгаат хагалгаатай байсан" гэжээ.

Түүний хувьд дуудсан цагт ирээд, мөрдөн шалгах ажиллагаанд саад учруулахгүй байвал биеэр хорих болон хилийн хориг тавих шаардлагагүй гэж үзсэн байна. Хувийн баталгаа гаргах тухай Эрүүгийн хянан шийдвэрлэх хуульд (14.2.2) "Яллагдагч шүүх, прокурорын мэдэгдэх хуудсаар дуудсан цагт хүрэлцэн ирэх, дахин гэмт хэрэг үйлдэхгүй, эрүүгийн хэрэг хянан шийдвэрлэх ажиллагаанд саад учруулахгүй байх талаар хувийн баталгааг бичгээр гаргаж, гарын үсэг зурна" гэсэн байна.