Ерөнхий сайд Л.Оюун-Эрдэнэ өнөөдөр УИХ-ын нэгдсэн чуулганд үг хэлжээ. Тэр энэ үеэрээ “Нүүрсний хулгайтай хийх тэмцэл Төрийн ордон дотор хүчин мөхөстөж байхад гадна гарч жагссан иргэд, залуустаа баярлалаа” гэв. Мөн “авилгатай хийх тэмцэлд нам харгалзахгүй, тэмцлээсээ ухрахгүй” гэсэн нь өөр дээр дахин “гал дуудсан” хэрэг болов. Хоёр өдрийн өмнө АТГ-аас “нүүрсний хулгайч”-аар зарласан УИХ-ын долоон гишүүний тав нь МАН-ын гишүүн байсан явдал нийгэмд “буум” болоод байгаа. Таван гишүүн Төрийн ордонд хэвлэлийн бага хурал зарлаж, “Жинхэнэ хулгайчдаа далдлахын тулд биднийг золиос болгон шидэж өглөө. Намаасаа гарна, жагсаалд нэгдэнэ” хэмээн мэдэгдсэн. Товчхондоо энэ хэргээс болж эрх баригч нам дотор томоохон зөрчилдөөн үүсэх нь тодорхой болов.

Мөн түүний хэлсэн үгэн дотор “Арван хуруундаа алтан бөгжтэй хууль сахиулагчдыг шударга ёс тогтооно гэдэгт олон нийт эргэлзэж байна. Зайсангийн амнаас Санзайн зуслан хүртэл Жи класс хөлөглөж, тансаг хаусанд амьдардаг төрийн албан хаагчдыг орлогоо нотлохыг ард түмэн шаардаж байна” гэсэн явдал нь өмнөхөөсөө ч илүү том “галаар” наадаж буй хэрэг юм.

Хэн ч харсан Ерөнхий сайдын хэлсэн энэ үг хуулийн байгууллагын томчууд, тэднийг ивээж байдаг эзэд рүү нь чиглэсэн болохыг ойлгож  болно. Жирийн нэг хууль сахиулагч, эргүүлийн цагдаа Зайсангийн аманд хаустай, Санзайд зуслантай, Жи клас хөлөглөж явахгүй нь ойлгомжтой. Хуулийн байгууллагын томчуудын энэ лут “хангамжийн” зардал хаанаас гардаг вэ гэдэг ч бас тодорхой. Арван хуруундаа алтан бөгж зүүсэн прокурор ядарсан, ядуурсан иргэдийн төлөө үг хэлнэ гэж байх уу? Жи клас унаж, Зайсангийн аманд хаус бариулахад прокурорын цалин хүрэлцэх үү?

Тиймээс Ерөнхий сайд хэдийгээр “Жагсагчид шаардаж байна” гэж хэлсэн боловч энэ үгийг чуулганы индэр дээрээс чанга дуугаар дамжуулснаараа өөрөө ч гэсэн “хам хэрэгтэн” болж байгаа юм. Магадгүй иргэдийн энэ шаардлагаар дамжуулаад хуулийн байгууллага дотор цэвэрлэгээ хийх боломж, нөхцлийг ч гэсэн Ерөнхий сайдын зүгээс олж харсан байж мэдэх юм.

Ингээд нүүрсний хулгайтай эхлүүлсэн тэмцлээсээ болж нам дотроо багагүй шахаанд ороод байгаа Ерөнхий сайд Л.Оюун-Эрдэнэ нэг дор хоёр галын дунд хавчуулагдсан болж таарч байна. Нэг талаас намын нөхөд, нөгөө талаас “авилгажсан” гэгддэг хууль, шүүхийнхэн.

Товчхондоо, Ерөнхий сайд чуулганы нэгдсэн хуралдаан дээр хэлсэн үгээрээ “Ордны гадна жагсаж байгаа иргэдийн дэмжлэг суларвал ордон дотор, нам дотроо хийж буй тэмцэл ялагдах магадлалтай шүү” гэдгийг тойруугаар анхаарууллаа.