Эдийн засгийн байнгын хорооны хуралдаанаар Уул уурхайн бүтээгдэхүүний биржийн тухай хуулийг хэлэлцлээ.

Энэ үеэр Цахим хөгжил, харилцаа холбооны сайд Н.Учрал "Нүүрсний хулгай гаргахгүй байхын тулд уул уурхайн цахим биржийг ажиллуулах ёстой. Цаашлаад хөрөнгийн бирж олон нийтийн компани болох ёстой гэдэг санаачилгыг иргэд тавьж байгаа. 

Сангийн яам нүүрсийг худалдах, борлуулах, тээвэрлэх гэрээг цахимжуулаад гаалийн бүрдүүлэлтийг нь цахимаар хийгээд, татвараа бас цахимаар төлдөг, хүнээс хамааралтай бус технологид суурилсан шийдлийг нэвтрүүлэх гэж байна. Нэгдүгээр сарын 1-нээс энэ ажил урагшлах гэж байгаа. Засгийн газрын хуралдаанаар Уул уурхай, хүнд үйлдвэрийн сайд түр журмаа оруулж ирнэ гэсэн мэдээлэлтэй байна. Ингэснээр нүүрсийг цахимаар арилжих нөхцөл бүрдэнэ гэж харж байгаа. 

Тэгэхээр цахим биржийн асуудалд хувийн хэвшлийнхэн хэрхэн оролцох вэ?" гэдэг талаар асуулт асуулаа.

Түүний асуултад Уул уурхай, хүнд үйлдвэрийн сайд Ж.Ганбаатар "Уг хууль мөрдөгдөж эхлэх хугацаа нь 2023 оны зургаадугаар сарын 30. Эхний ээлжид "Эрдэнэс Тавантолгой" ХК-ийн 30-40 хувийн нүүрсийг биржээр зарна гэж зорьж байгаа. Цаашдаа бол боломжит хэмжээгээр нүүрсээ биржээр зарах юм.

Хувийн компаниуд нүүрсээ биржээр санал гаргаж байгаа. Ингээд хувийн компаниудтай хамтраад нүүрсний биржээ түр журмын дагуу ажиллуулна" гэлээ. 

Харин Уул уурхай, хүнд үйлдвэрийн дэд сайд О.Батнайрамдал "Уул уурхайн бүтээгдэхүүний биржийн тухай хууль 2014 оноос яригдаж эхэлсэн. Анхны хувилбар нь 100 хувь төрийн өмчит компани гэдэг агуулга байсан юм билээ. Бидний хувьд бирж нь төрийн өмчийн оролцоотой хуулийн этгээд байна гэдэг агуулгыг хуулийн төсөлд оруулсан. Засгийн газар болон бусад олон нийтийн хувьцаа эзэмшигч орох нь нээлттэй.

Монголын хөрөнгийн биржийн туршлагыг ашиглаад уул уурхайн бүтээгдэхүүний биржийг цаашид төрөлжүүлэх боломжтой. Хуулиар үүнийг нээлттэй үлдээж байгаа" гэв.