ЗГХЭГ-ын дарга Д.Амарбаясгалан, Хууль зүйн сайд Х.Нямбаатар өчигдөр хуралдсан Засгийн газрын ээлжит бус хуралдаанаар шийдвэрлэсэн зарим асуудлын талаар төрийн ордонд мэдээлэл хийлээ.

Хууль зүй, дотоод хэргийн сайд Х.Нямбаатар Эрүүгийн хуульд өөрчлөлт оруулахаар болсныг мэдээллээ. Эрүүгийн хуулийн тусгай ангийн 22-р зүйлд заасан гэмт хэрэгт “хялбаршуулсан журмаар хэрэг шийдвэрлэх” ажиллагаа явуулдаг байсныг өөрчилж, ялын бодлогыг чангатгахаар болсныг дуулгав. Мөн энэ хуулийн дагаж Эрүүгийн хэрэг хянан шийдвэрлэх тухай хуульд өөрчлөлт оруулахаар Засгийн газраас хуулийн төсөл өргөн барина гэв.

Харин ЗГХЭГ-ын дарга Д.Амарбаясгалан УИХ-ын гишүүн Т.Доржхандын мэдээлсэн “Нүүрсний хулгайгаас 40 их наяд төгрөгийн хохирол улсад учирсан” гэдэг мэдээлэл бодитой бус болохыг мэдээллээ. ЗГХЭГ-ын даргын мэдээлснээр өнгөрсөн хугацаанд Монгол улс нүүрсний экспортоор нийт 45,2 их наяд төгрөгийн борлуулалт хийсэн байна. Үүнээс Т.Доржханд гишүүний мэдээлэлд дурьдагдсан “сүүлийн 10 жил” буюу нүүрсийг идэвхитэйгээр экспортолж эхэлсэнээс хойш (2011-2022 оны арваннэгдүгээр сар хүртэл) хугацаанд 43,5 их наяд төгрөгийн нүүрс борлуулжээ. Үүнийг Т.Доржханд гишүүний мэдээлэлтэй харьцуулж үзвэл хоёр чингэлэг нүүрс тутмын нэгийг нь хулгайд алдсан болж байгаа юм. Тиймээс энэ бол бодит бус мэдээлэл гэдгийг ЗГХЭГ-ын дарга Д.Амарбаясгалан залрууллаа.

Мөн өнгөрсөн хугацаанд нүүрс экспортлогч аж ахуйн нэгжүүд нийт 8,9 их наяд төгрөгийн татварын орлогыг төсөвт төвлөрүүлсэн бөгөөд 0,7 их наяд төгрөгийн татварын өр төлөгдөөгүй байна. Энэ хугацаанд (2011-2022 он) татварын байгууллагаас нүүрсний экспортод оролцож байгаа 177 аж ахуйн нэгжид давхардсан тоогоор 239 удаагийн хяналт шалгалт хийж, 0,3 их наяд төгрөгийн зөрчил илрүүлж акт тавьсан байна. Ингээд татвартай холбоотой нэг их наяд төгрөгийн өр төлбөр, торгууль төлөгдөөгүй байгааг Татварын бүртгэл мэдээллийн нэгдсэн сангаас эх сурвалж болгон ЗГХЭГ-ын дарга мэдээллээ.

Ямартай ч эрх баригч МАН, түүний Засгийн газрын зүгээс "нүүрсний хулгай"-тай холбогдуулан нисгэсэн бөөн бөөн "бор шувуу", олон нийтийг цочоосон том том тоонууддаа залруулга хийж эхэллээ. Ядаж л "Эрдэнэс Тавантолгой" ХК, "Эрдэнэт үйлдвэр" ТӨҮГ зэрэг стратегийн ач холбогдол бүхий том аж ахуй нэгжүүдээ олон нийтийн хяналтанд оруулна, IPO гаргаж, нээлттэй хувьцаат компани болгоно гэв.