МАН-ын бүлгийн хуралдаан болж, УИХ-ын гишүүн Л.Мөнхбаатар мэдээлэл өглөө. 

Тэрээр "Эрх мэдэл, албан тушаалаа урвуулан ашиглаж, их хэмжээний хохирол учруулсан бол торгохгүй, зорчих эрхийг нь хязгаарлахгүй, нийтийн албанд ажиллах эрхийг найман жил хүртэлх хугацаагаар хасаад, дээр нь 2-8 жилийн хорих ял оногдуулах өөрчлөлтийг ярьж байгаа. Хахууль авах гэмт хэргийн хувьд ял шийтгэлийг чангаруулна. Одоо хүчин төгөлдөр үйлчилж буй хууль дээр хахууль өгч, авсны үүднээс албаны чиг үүргээ хэрэгжүүлэх, бусдаар дамжуулан хахууль өгөхийг шаардсан бол, авсан бол нийтийн албанд томилогдох эрхийг 2-10 жил хүртэлх хугацаагаар хасаж, 2.7-14 сая төгрөгтэй тэнцэх хэмжээний мөнгөөр торгох, эсвэл 3-6 сар хүртэлх хугацаагаар зорчих эрхийг хязгаарлах, 6 сараас гурван жил хүртэл хорих ял шийтгэх гэсэн арга хэмжээ авдаг. 

Шинэ хуулиар зорчих эрхийг хязгаарлах шийтгэлийг хасаад, торгох, хорих шийтгэлийг нэмэгдүүлнэ. Улс төрийн буюу нөлөө бүхий албан тушаалтны хувьд тусгайлан авч үзэж байгаа. Нийтийн албан тушаалтан хахууль авах гэсэн зүйл бий. Үүн дээр энэ гэмт хэргийг хясан боогдуулах аргаар эсвэл их хэмжээний хахууль авсан бол нийтийн албанд ажиллах эрхийг 5-8 жил хүртэлх хугацаагаар хасаж, 5-12 жил хүртэлх хугацаагаар хорих ял шийтгэнэ гэж заасан. Тухайн гэмт хэргийг улс төрд нөлөө бүхий этгээд эсвэл зохион байгуулалттай гэмт бүлэг үйлдсэн бол нийтийн албанд ажиллах эрхийг 20 жилийн хугацаагаар хасаж, 12-20 жил хүртэлх хугацаагаар шийтгэх нь зүйтэй гэж үзсэн. Энэ мэтчилэн үндэслэлгүйгээр хөрөнгөжих тухайд ч ял шийтгэлийн бодлогыг нэмэгдүүлнэ" гэлээ.