УИХ дахь АН-ын бүлгийн хурлаар хэлэлцсэн асуудлын талаар мэдээлэл хийлээ.
Энэ үеэр УИХ-ын гишүүн С.Одонтуяа "Нүүрсний хулгайн асуудлаар нээлттэй сонсгол хийх шаардлагыг УИХ-ын гишүүд хүргүүлж байгаа. Энэхүү шаардлагад АН-ын бүлгийн 6-7 гишүүн гарын үсэг зурсан юм. Хөгжлийн Банкны асуудал, нүүрсний хулгайн асуудлыг АН руу чихэх гэж байгаа учраас бид манлайлж оролцоно.
Зөвхөн МАН-ын дээд албан тушаалтнуудтай танил хүмүүс нүүрсний хулгай хийж, мафи бий болсон. Тиймээс энэ асуудал дээр бид сайн ажиллана" гэлээ.
Мөн түүнчлэн бүлгийн гишүүд нүүрсний хулгайд нэр холбогдсон асуудлаар "А.Адъяасүрэн гишүүний хувьд нүүрсний тээвэр хийдэг компанитай байсан. Тариф, үнэ өртөг нэмэгдсэн учраас тухайн тээврийн бизнес нь хаагдсан. Нүүрсний хулгайг хамгийн эрх мэдэлтэй, танилтай хүмүүс хийж чадаж байна. Тиймээс нүүрсний хулгайтай холбоотой асуудалд А.Адъяасүрэн гишүүн ямар нэгэн хамааралгүй гэдгийг өөрөө ч хэлсэн байгаа. Бүлгээс ч мөн хариуцлагатайгаар мэдэгдэж байна" гэв.
Харин Бүлгийн дарга О.Цогтгэрэл "МАН-ын мөрийн хөтөлбөрийн дүгнэлт, дүүргүүдийн иргэдийн хурлын төлөөлөгчдийг урьж, саналыг нь сонслоо. МАН-ын мөрийн хөтөлбөр дээр иргэдийн орлогыг хоёр дахин нэмэгдүүлж, ядуурлыг хоёр дахин бууруулна гэсэн. Энэ олон зүйл заалт биелэхгүй байгаа шалтгаан нь нүүрсний хулгайн асуудал.
Түүнчлэн нүүрсний хулгайн асуудлыг хэлэлцсэн. Уг асуудлаар Ерөнхий сайд Л.Оюун-Эрдэнэд шаардлага хүргүүлсэн. Энэ талаарх мэдээллийг олон нийтэд нээлттэй хүргэмээр байна. Ингэхгүй байгаагаас болж хардлага гүнзгийрлээ.
Хоёр долоо хоногийн хугацаанд нүүрсний хулгайн ямар ч мэдээлэл ил тод болсонгүй. Нүүрсний хулгайг эрх баригчид ил болгоогүй, олон улсын байгууллага сануулж хэлсэн.
АН-ын бүлгийн хүмүүс нүүрсний хулгайн асуудалд холбогдсон бол нам харгалзахгүй шалгах хэрэгтэй. Эрх мэдэл байгаагүй учраас манай намын бүлгийн гишүүд тийм том хэмжээний хулгайд оролцоогүй гэдэгт итгэж байгаа. Хардлагаар асуудалд шийдэхээс илүү нүүрсний хулгайн асуудлыг богино хугацаанд ил тод болгохгүй бол олон нийтийн талд хатуу байр суурийг илэрхийлэхээс өөр аргагүй" гэлээ.
