Улсын Онцгой комиссын өргөтгөсөн V дугаар хуралдаан үеэр Монгол Улсын сайд, Түгжрэлийг бууруулах үндэсний хорооны дарга Ж.Сүхбаатар түгжрэлийн асуудлаар байр сууриа илэрхийлэв. 

Тэрээр "Түгжрэлтэй бүх л юм уялдах юм. Түгжрэл гээд байгаа болохоос биш яг тусдаа салбар байхгүй. Жишээлбэл, гэр хороололд эмийн сан маш бага байгаа нь эмийн сангийн дата дээр харагдаж байна. Орон сууцны хорооллуудад нэг булан эргээд л эмийн сан байдаг. Харин хүмүүс эмийн сан хайж ийш тийшээ явдаг.

Мөн зам тээврийн хөдөлгөөнд танхайрал ноёрхож байна. Даатгал, торгуулиа төлдөггүй, оношилгоонд ордоггүй байдал хэт хавтгайрсан нь түгжрэлд нөлөөлж байна. Саяхан бараг 0 зогссон нөхцөл үүсэхэд зарим нь 5-6 цаг түгжирсэн гэж байна. Миний хувьд ямартай ч гурван цаг түгжирч мэдэрсэн. Хэрэв түгжрэлийг түргэн хурдан шийдэх зохицуулалт байсан бол надаас өмнө хийх боломжтой байсан. Харин цаашдаа сонголттой тээврийн хэрэгсэл байх уу, үгүй юу гэдэг асуудал тулгараад байна" гэсэн юм.