Лхагва гаригт хуралдсан Засгийн газрын ээлжит хуралдаанаас "Төрийн ордны мэдээлэл, үйлчилгээний цогцолбор" төрийн өмчит, аж ахуйн тооцоот газрын үйл ажиллагааг 2023 оны нэгдүгээр сарын 1-нээс зогсоох шийдвэр гарчээ.
Энэ байгууллагад Төрийн ордон дотор үйл ажиллагаа явуулдаг ресторан, зоогийн газрууд, кофе шоп, төв талбайн баруун талын "Элит" ресторан, Засгийн газрын хэвлэх үйлдвэр хамаарагддаг юм байна. Ирэх оны нэгдүгээр сарын 1-нээс эдгээр байгууллагын үйл ажиллагааг зогсоож байгаа нь Төрийн хэмнэлтийн хуулийн хэрэгжилттэй холбоотой гэдгийг ЗГХЭГ-ын дарга Д.Амарбаясгалан мэдээлжээ.
Ирэх оны нэгдүгээр сарын 1-нээс эхлэн эдгээр үйлчилгээг ААН-үүдэд түрээсээр эрхлүүлэх юм байна. Мөн буугдсан "Төрийн ордны мэдээлэл, үйлчилгээний цогцолбор" төрийн өмчит, аж ахуйн тооцоот газрын ажилтнуудад халагдсаны тэтгэмжийг олгох аж. Харин сонгон шалгаруулалтад орох ААН-үүд нь улстөрчид болон тэдний бизнес, хамтрагчтай холбоотой байх ёсгүй гэдэг шаардлагыг Засгийн газрын тогтоолд тусгажээ.
