Пүрэв гаригийн УИХ-ын чуулганы үдээс хойших хуралдаанаар Төрийн албаны тухай хуульд өөрчлөлт оруулах хуулийн төслийг хэлэлцэв. Төсөлд аймгийн төвөөс бусад сумын ЗДТГ-т тасралтгүй ажиллаж байгаа төрийн захиргааны албан хаагчид таван жил тутамд нэг удаа зургаан сарын үндсэн цалинтай нь тэнцэх хэмжээний мөнгөн урамшууллыг олгох зохицуулалтыг тусгажээ. 

Хуулийн төслийг санаачилсан УИХ-ын гишүүн С.Чинзориг:

-"Орон нутгийн нэмэгдлийг ялгамжтай тогтоож болох юм. Тухайлбал, говийн аймгууд, Улаанбаатар хотоос хэт алслагдсан баруун аймгуудад ажиллаж амьдарч байгаа төрийн албан хаагчдад олгох орон нутгийн нэмэгдэл нь арай өөр байж болно. Зөвхөн төрийн захиргааны албан хаагчдад орон нутгийн 20 хувийн нэмэгдэл олгох хууль орж ирсэн. Тэгэхээр орон нутагт ажиллаж байгаа төрийн үйлчилгээний албан хаагчдад 20 хувийн нэмэгдэл өгөх үү байх уу гээд асуудал бий. Төсвийн хуулийн хоёр дахь хэлэлцүүлэгт бэлтгэх, ажлын хэсэг оновчтой тогтооход анхаармаар байна. Төрийн захиргааны албан хаагчдад орон нутгийн нэмэгдлийг ялгамжтай олгох нь зүйтэй" гэв. 

Чуулганы хуралдаанаас Төрийн албаны тухай хуульд нэмэлт өөрчлөлт оруулах тухай хуулийг гишүүдийн олонх хэлэлцэх нь зүйтэй гэж үзсэн тул анхны хэлэлцүүлэгт бэлтгүүлэхээр Төрийн байгуулалтын байнгын хороонд шилжүүллээ. 

Мөн өдөр “Эрдэнэт үйлдвэр” Төрийн өмчит үйлдвэрийн газрын технологид тохирохгүй хүдрийн овоолгыг ашиглах тухай” УИХ-ын тогтоолын төслийг хэлэлцэх эсэхийг хэлэлцэж, гишүүдийн олонх дэмжив. 

Хэлэлцэж буй асуудалтай холбогдуулан гишүүд асуулт асууж, хариулт авлаа. 

УИХ-ын гишүүн О.Цогтгэрэл:

-Эрдэнэтийн овоолгыг ашигласнаар иргэд ямар ашиг хүртэх вэ? Хэчнээн овоолго байдаг вэ? Ямар зардалтай үйл ажиллагаа явуулж, ямар хэмжээний ашиг олдог вэ? 

Төрийн өмчийн бодлого зохицуулалтын газрын дарга Б.Цэнгэл:

-Эрдэнэт үйлдвэрт 10 овоолго байгаа. Үүн дотроо исэлдсэн хүдрийн овоолго 4, тодорхой нөхцөлд үр ашгаа өгөх овоолго 6 байна. Исэлдсэн хүдрийн овоолго нь 52.4 сая тонн нөөцтэй. Харин нөгөөх нь 222.2 сая тонн нөөцтэй гэж үзэж байгаа. Эрдэнэт үйлдвэртэй ТӨБЗГ хамтарсан ажлын хэсэг байгуулаад ажилласан. 480 гаруй сая ам.долларын үнэ цэнэ бүхий зүйл байна гэсэн тооцоолол гарсан. Овоолгоо үнэлэх нь зүйтэй гэдэгтэй санал нийлж байна. Овоолгоо худалдах нь зүйтэй гэдэг нэг хувилбар яригдаж байна. 

Тогтоолын төслийг хэлэлцэх эсэхээр санал хураалт явуулсны дараа Нийтийн албанд нийтийн болон хувийн ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төслийг хэлэлцэв. 

Төслийг санаачлагч УИХ-ын гишүүн Ш.Адьшаа "Авлигын эсрэг хуульд заасны дагуу хөрөнгө, орлогын мэдүүлэг гаргадаг албан тушаалтан албан үүргээ гүйцэтгэх үедээ ипотекийн зээл болон эрүүл мэндийн үйлчилгээ авахаас бусад зориулалтаар хувийн ашиг сонирхлын мэдүүлэгтээ мэдүүлсэн жилийн орлогын 80 хувиас дээш хэмжээний зээлийг бусад этгээдээс авахыг хориглох шаардлагатай" гэж үзжээ.

Түүнчлэн төрөөс баталгаа гаргасан хөрөнгө оруулалтыг аливаа этгээдэд хууль зөрчин олгуулахаар нөлөөлөх, улс төрд нөлөө бүхий албан тушаалтан, тэдгээрийн хамаарал бүхий этгээдийн хувь эзэмшдэг хуулийн этгээд төрөөс баталгаа гаргасан хөрөнгө оруулалтад хамрагдах зэрэг асуудлыг хориглож, үүнийг нийтийн албан тушаалаас чөлөөлөгдсөнөөс хойш хоёр жилийн хугацаанд мөн дагаж мөрдөх асуудлыг тодорхой зохицуулахаар төслийг боловсруулсан байна. 

Хуралдааны төгсгөлд хуулийн төслийг хэлэлцэх эсэхээр санал хураалт явуулах байсан боловч гишүүдийн ирц хүрээгүй тул санал хураалтыг хойшлууллаа.