АН-аас Ерөнхий сайд Л.Оюун-Эрдэнэ, УИХ дарга Г.Занданшатар нарт хандан энэ сарын 17-нд албан шаардлага хүргүүлсэн билээ.
Уг шаардлагын хариуг Засгийн газраас өнөөдөр өгөхтэй холбоотойгоор Ардчилсан Намын төлөөлөл төрийн ордны гадна мэдээлэл хийлээ.
АЗХ-ны тэргүүн Н.Болдбаатар "Бид есдүгээр сарын 27-нд төрийн ордны гадна Монгол Улсын Ерөнхий сайд болон Засгийн газрын нийт гишүүдэд хандан шаардлага хүргүүлсэн. Түүнчлэн энэ долоо хоногийн даваа гаригт АН-ын Үндэсний бодлогын хорооноос шийдвэр гарч, Монгол Улсын Засгийн газарт дараах шаардлага өгсөн.
- Нэн тэргүүнд хүний эрхийн асуудлын хүрээнд шаардлага хүргүүлсэн. ХНХ-ын сайд асан Д.Сарангэрэл Үндсэн хууль зөрчсөн гэдгийг Засгийн газрын Хэрэг эрхлэх газрын дарга Д.Амарбаясгалан хэлж байсан. Үүний зэрэгцээ Сангийн яамны шторктой холбоотой асуудал ч яригдсан. Мөн үзэл бодлоо илэрхийлж буй олон залуусыг цагдаа сэргийлэхээр айлган сүрдүүлж, барьж хорьсон. Энэ мэтчилэн хүний эрхийн зөрчилтэй үйлдэл цөөнгүй гарлаа.
- Түүнчлэн өргөн хэрэглээний бараа бүтээгдэхүүн тэр дотроо гурил, гурилан бүтээгдэхүүн, махны үнэ нэмэгдэж байгаа. Валютын ханш, инфляцын огцом өсөлт зэрэг асуудал иргэдийг туйлдуулж байна.
- Монгол Улсын 2023 оны төсөв батлагдах гэж байгаа. Ирэх оны улсын төсвийн хуваарилалт ямар байна вэ, эрх тэгш хангагдаж байгаа юу гэдэг асуултыг дэвшүүлж байна.
- Ирэх онд зөвхөн Хэнтий аймагт л гэхэд 200 орчим тэрбум төгрөг төсөвлөх юм байна. Монгол Улсын эдийн засаг хүнд нөхцөлд орсон энэ үед үрэлгэн зардал шаардлагагүй. Мөн 2023 оны төсөвт татварыг нэмэгдүүлж буй, үүний зэрэгцээ НӨАТ-ын асуудал ч байгаа учраас Ардчилсан Намын Үндэсний бодлогын намрын анхдугаар чуулганаар хэлэлцэж, улмаар Засгийн газарт шаардлагыг өгсөн.
Өнөөдөр өглөө 09:30 цагт Засгийн газраас шаардлагын хариуг өгнө гэсэн. Харамсалтай нь ирсэнгүй. Тиймээс дээрх шаардлагын хариуг нэн даруй өгөх ёстой. Одоо төрийн ордон дотор ирэх оны улсын төсвийг хэлэлцэж байна. Үнэндээ энэ улсын төсөв бол тэдний сонгуулийн зардал. 2024 онд МАН яаж ялах вэ гэдгийг төсвөөрөө дамжуулаад хийх гэж байна. Энэ мэтчилэн олон асуудал бий. Бид зөвхөн Д.Сарангэрэлийг сайдын суудлаас нь унагаах гэж шаардлага өгөөгүй. Монгол Улсын Засгийн газартай холбоотой олон асуудлыг ярьсан. Засгийн газрын хуралдааны дараа албан ёсоор өгнө хэмээн хэлсэн. Эрх баригчид цаг хожиж, аливааг хойшлуулж тэр хооронд төсвийг батлуулах далд санаатай байна уу гэдэг хардлага байна" гэсэн юм.
