АН-аас 2023 оны улсын төсвийн төслийн талаарх асуудлаар Монгол Улсын Засгийн газарт шаардлага хүргүүллээ. 

АН-ын дарга С.Эрдэнэ "Өнгөрсөн долоо хоногт АН-ын Үндэсний бодлогын хорооны хуралдаанаа хийсэн. Шинэ дүрмийнхээ хүрээнд бүтэц, зохион байгуулалтын өөрчлөлтийг хийж байна. Цаашид УИХ-ын чуулганы хуралдааны явц, байнгын хороодын үйл ажиллагаатай уялдуулж, хяналт тавьж ажиллана. Улс төрийн сөрөг хүчний гол намын хувьд үйл ажиллагаагаа давхар явуулна. Хуралдаанаар АН-ын Үндэсний бодлогын хорооны даргаар УИХ-ын гишүүн Д.Ганбатыг сонгож томиллоо. Дэд даргаар Ч.Сайханбилэгийг томилж, баталлаа. 

Мөн Монгол Улсын 2023 оны төсвийг хэлэлцсэн. Маш шүүмжлэлтэй хандсан. Улсын төсвийг 2024 оны бүх шатны сонгуульд зориулж, сонгуулийн төсөв болгон оруулж ирж байна гэж харсан. Үндсэндээ 100 хувь боломжгүй төсөв байна гэж дүгнэсэн. Улсын төсвийг бүхэлд нь эргүүлэн татаж авах, зарим заалтад тодорхой саналыг дэвшүүлж шаардлага хүргүүлж байна. Хэрэв төсвийг буцааж татахгүй бол АН цаашид улс төрийн хүчтэй тэмцэлд шилжилж ажиллана" гэж мэдэгдлээ.