Өчигдөр буюу пүрэв гаригт НҮБ-ын ерөнхий ассамблейн чуулганы үеэр Хүний эрхийн зөвлөлийн шинэ гишүүн орнуудыг сонгох нууц санал хураалтыг явуулжээ.
Нэрээ дэвшүүлсэн улсуудаас НҮБ-ын гишүүн орнуудаас хамгийн олон санал авсан 12 улс Хүний эрхийн зөвлөлд сонгогдсон байна. Эдгээр 12 оронд Алжир, Бангладеш, Бельги, Чили, Коста-Рика, Гүрж, Киргизстан, Мальдив, Морокко, Румын, Өмнөд Африкийн БНУ, Вьетнам улс багтжээ.
Мөн Өмнөд Солонгос, Венесуэл улсууд зөвлөлд дахин сонгогдохоор нэрээ дэвшүүлсэн ч хангалттай санал авч чадалгүй хасагдсан байна. Өмнөд Африкийн БНУ хамгийн олон буюу 182 орны санал авч сонгогдсон бол Ази, Номхон далайн орнуудаас Бангладеш 160, Мальдив 154, Вьетнам 145, Киргизстан 126, Өмнөд Солонгос 123, Афганистан 12, Бахрейн 1, Монгол 1 санал авсан байна.
Дэлхий дахинд хүний эрхийг хамгаалах, сайжруулах үүрэгтэй уг зөвлөл нь НҮБ-ын гишүүн орнуудын нууц санал хураалтаар сонгогдсон 47 улсаас бүрдэж, Швейцарын Женев хотод төвлөдөг.
Эх сурвалж: UN.ORG
