Засгийн газрын ээлжит хуралдаанаар хэлэлцсэн асуудлын талаар ЗГХЭГ-ын дарга Д.Амарбаясгалан мэдээлэл хийлээ. 

Д.Амарбаясгалан:

-"Засгийн газрын хуралдаанаар 25 асуудал хэлэлцсэн. Хамгийн эхэнд Монгол Улсын Засгийн газрын хуралдааны журамд өөрчлөлт оруулах асуудлыг хэлэлцлээ. Төрийн ажлын үр бүтээмжийг нэмэгдүүлэх, илүү хурдтай ажиллах, эрдэмтэн судлаачдын санаа бодлыг хэлэлцэж байгаа асуудалд тусгадаг болох зэрэг өөрчлөлтийг хуралдааны журамд орууллаа.

Мөн хувийн хэвшил, мэргэжлийн төрийн бус байгууллагаар гүйцэтгүүлэх ажил, үйлчилгээний талаар авах арга хэмжээний тухай таван заалт бүхий тогтоолын төслийг баталлаа. Төр хувийн хэвшилтэй өрсөлдөж, тодорхой түвшний бизнесийг эрхлэх ёсгүй. Тодруулбал, төрийн зүгээс эрхлэх шаардлагагүй сургууль, цэцэрлэгийн хүнс хангамжийн үйлчилгээ, тохижилт үйлчилгээний газрын зарим чиг үүргийг төр хэрэгжүүлэх шаардлагагүй юм.

Дараагийн асуудал нь шинээр бий болгосон гурван сайдын албан тушаалын хоёр нь ажлаа авсан. Тэдгээр сайд нарын ажлын албыг шинээр байгууллаа. Засгийн газрын бүрэлдэхүүнд Боомтын сэргэлтийн үндэсний хорооны дарга, Улаанбаатар хотын авто замын түгжрэлийг бууруулах үндэсний хорооны дарга, Олимп, нийтийн бие тамирын үндэсний хорооны дарга гэдэг гурван сайдын орон тоог бий байгуулсан.

Боомтын сэргэлтийн үндэсний хороон дарга нь хороондоо 10 хүний бүрэлдэхүүнтэй байна. Орон тооны бусаар ажиллах 10 хүн нь салбар яамдууд дээр ажил хариуцаад ажиллаж байгаа хүмүүс гэсэн үг. Харин сайдын ажлын алба нь орон тооны таван хүний бүрэлдэхүүнтэй ажиллана. Ажлын алба нь дотроо дарга, нарийн бичгийн дарга, мэргэжилтэнтэй байна.

Улаанбаатар хотын авто замын түгжрэлийг бууруулах үндэсний хорооны дарга Үндэсний хороондоо 32 хүний бүрэлдэхүүнтэй байна. Үндэсний хорооны нарийн бичгийн даргаар Улаанбаатар хотын Засаг дарга Д.Сумъяабазар ажиллана бөгөөд бүрэлдэхүүнд нь салбарын сайд, мэргэжилтнүүд байна. Харин ажлын алба нь орон тооны зургаан хүний бүрэлдэхүүнтэй байна.

Олимп, нийтийн бие тамирын үндэсний хорооны дарга нь 14 хүний бүрэлдэхүүнтэй үндэсний хороог удирдаж ажиллана. Мөн адил тус хороонд салбарын сайд, мэргэжилтнүүд, Үндэсний олимпын хорооны ерөнхийлөгч нар ажиллана. Орон тооны таван ажилтантай ажлын албатай байна" гэлээ. 

Ташрамд дурдахад, Монгол Улсын сайд, Улаанбаатар хотын авто замын түгжрэлийг бууруулах үндэсний хорооны даргаар УИХ-ын гишүүн Ж.Сүхбаатар, Монгол Улсын сайд Олимп, нийтийн бие тамирын үндэсний хорооны даргаар УИХ-ын гишүүн Б.Бат-Эрдэнэ нар томилогдсон. Харин Монгол Улсын сайд Боомтын сэргэлтийн үндэсний хорооны даргыг томилоогүй байгаа билээ.