Монгол Улсын Ерөнхийлөгч У.Хүрэлсүх Шанхайн хамтын ажиллагааны байгууллагын дээд хэмжээний уулзалтад оролцоно. Дээд хэмжээний уулзалт Узбекистаны Самарканд хотод энэ сарын 15-16-нд зохион байгуулагдах юм байна. Уулзалтад, ОХУ-ын ерөнхийлөгч Владимир Путин, Хятадын дарга Ши Жиньпин нар оролцох бөгөөд энэ үеэр ОХУ, БНХАУ, Монголын төрийн тэргүүнүүдийн гурван талт дээд хэмжээний уулзалт болно.

Мөн ирэх долоо хоногт болох НҮБ-ын Ерөнхий ассамблейн 77 дугаар чуулганд Ерөнхийлөгч У.Хүрэлсүх оролцоно. Уг чуулганыг энэ жил “Шийдвэрлэх мөч, харилцан хамааралтай сорилтуудад өөрчлөлт авчрахуйц шийдэл” сэдвийн дор энэ сарын 22-26-нд зохион байгуулах аж. Ерөнхийлөгч У.Хүрэлсүх есдүгээр сарын 21-нд Нью Йорк хотноо ажиллаж, уг чуулганы санал шүүмжлэлд оролцоно. Ингэхдээ, олон улсын харилцааны тулгамдсан асуудлаар Монгол Улсын байр суурь, төр засгаас хэрэгжүүлж буй гадаад бодлогын зорилт, тэргүүлэх чиглэл, нийгэм эдийн засгийн байдал, тулгамдаж буй саад бэрхшээлийг даван туулах, талаар хэрэгжүүлж буй бодлого үйл ажиллагааг танилцуулж үг хэлэх юм байна.