ОХУ-ын Владивосток хотод болох Дорнын эдийн засгийн чуулганд Монгол Улсын Ерөнхий сайд Л.Оюун-Эрдэнэ оролцоно. Уг чуулга уулзалт жилд хоёр удаа тогтмол зохион байгуулагддаг бөгөөд манай улс Ерөнхийлөгчийн түвшинд оролцсоор ирсэн юм.

Энэ талаар Гадаад харилцааны сайд Б.Батцэцэг "Эргэн тойрондоо болж буй эдийн засгийн харилцааны гадна үлдэж болохгүй. Аль болох оролцоогоо нэмэгдүүлж, хөгжлийн бодлогоо хэрэгжүүлж, томоохон төслүүдээ урагшлуулж байх нь манай улсын эрх ашигт нийцнэ. Швейцарын Давост болдог Дэлхийн эдийн засгийн форум, БНХАУ-ын Баод болдог Азийн чуулга уулзалтад ч мөн адил өндөр түвшинд оролцдог. Ингэхдээ чуулга уулзалтуудын бүх боломжийг дээд хэмжээнд ашиглах зорилт тавьж, сайтар бэлддэг. 

Дорнын эдийн засгийн чуулга уулзалтад оролцох гэж буй Ерөнхий сайдын гол зорилго нь томоохон төслүүд болох Эгийн голын усан цахилгаан станц, баруун босоо, зүүн босоо тэнхлэгийн төмөр зам, төмөр замын төв коридорын асуудлуудаар ярилцах юм.

Мөн эрчим хүчний нийлүүлэлт, шатахууны тогтвортой хангамж, үнийн асуудлаар ОХУ-ын Ерөнхийлөгч В.В.Путин болон Засгийн газрын гишүүд, ОХУ-ын төрийн өмчит томоохон компаниудын удирдлагуудтай уулзахаар тохирсон. 

Хоёр хөршийн харилцаанд тэргүүлэх ач холбогдол өгдөг манай улсын гадаад бодлогыг гуравдагч хөршүүд маань сайн ойлгодог. Гуравдагч хөршүүдтэйгээ харилцаагаа улам өргөжүүлэх эрмэлзлийг хоёр хөрш маань ойлгодог гэж дүгнэж болно. 

Монгол Улс энхийг эрхэмлэсэн, нээлттэй, бие даасан, олон тулгуурт гадаад бодлоготой улс. Бүс нутгийн аливаа санаачилга, эргэн тойронд болж буй үйл явцад тасралтгүй оролцох нь Монгол Улс стратегийн бие даасан бодлоготой гэдгийг дэлхий нийтэд харуулах чухал хүчин зүйл гэдгийг онцлон хэлмээр байна" гэлээ.