Гадаад харилцааны сайд Б.Батцэцэг нийгмийн сүлжээнд тараад байгаа зарим мэдээлэлд тайлба хийлээ.
Тэрээр "Япон улсын Засгийн газар манай улсад хэрэгжүүлж буй төсөл хөтөлбөрүүд болон зээл тусламжаа зогсоолоо гэх мэдээлэл бол бодит байдалд огт нийцэхгүй, ташаа мэдээлэл. Гадаад улсын Засгийн газрын нэрийн өмнөөс худал мэдээлэл тарааж байгаа нь хоёр улсын харилцаа, ард иргэдийн дунд үл ойлголцол үүсгэх, үл итгэлцлийг бий болгох гэсэн хорлон сүйтгэх ажиллагаа гэж үзэж болохоор байгааг онцлон тэмдэглэхийг хүсэж байна.
Монгол Улс Япон улстай иж бүрэн стратегийн харилцааг хөгжүүлж байгаа. Энэ онд хоёр улсын хооронд дипломат харилцаа тогтоосны 50 жилийн ой тохиож байна" гэлээ.
Мөн тэрээр "БНСУ руу зорчих транзит нислэгт заавал виз авах шаардлагатай болжээ" гэх мэдээлэлд "Бүх нислэг БНСУ-аар транзит явж байгаа учир худал ташаа мэдээлэл тараах нь ихээхэн хортой. Гуравдагч хөрштэй хэрэгжүүлж буй бодлогод сөргөөр нөлөөлүүлэхгүй байх, Монгол Улсын нэр хүндийг олон улсын тавцанд хадгалах, өндөрт өргөхөд туслалцаа үзүүлэхийг хүсэж байна. Гадаад харилцааны яас зориудаар худал мэдээлэл тарааж буйг нэгтгэж, хууль хяналтын байгууллагад хандах гэж байгаа" гэлээ.
