Л.Оюун-Эрдэнийн Засгийн газрын шинэ бүрэлдэхүүнд ажиллах сайд нар өнөөдөр 11:40 цагт УИХ-ын танхимд тангараг өргөнө. 

Давхар дээлийн хязгаарлалттай холбоотой хуулийн заалт хүчингүй болж, Засгийн газар бүтэц бүрэлдэхүүндээ өөрчлөлт орууллаа. Өчигдөр УИХ-ын ээлжит бус чуулганаар Засгийн газрын гишүүнийг томилох, чөлөөлөх асуудлыг хэлэлцсэн юм. 

Харалдаанаар Ерөнхий сайд болон 21 гишүүнтэй, бүтцийн хувьд ерөнхий чиг үүргийн дөрөв, чиглэлийн 12 яамтай байхаар тусгасан Засгийн газрын бүрэлдэхүүн болон бүтцийн тухай хуулийг баталсан юм.

Ерөнхий сайд Л.Оюун-Эрдэнэ бүрэн эрхийнхээ хүрээнд сайд нарыг чөлөөлөх, томилох асуудлыг өөрөө оруулж ирэ танилцуулсан юм. 

Үүнд:

1. Шадар сайд С.Амарсайхан,

2. Хууль зүй, дотоод хэргийн сайд Х.Нямбаатар,

3. Сангийн сайд Б.Жавхлан,

4. Гадаад хэргийн сайд Б.Батцэцэг,

5. Батлан хамгаалахын сайд Г.Сайханбаяр,

6. Байгаль орчин аялал жуулчлалын сайд Б.Бат-Эрдэнэ,

7. Соёлын сайд Ч.Номин,

8. Боловсрол, шинжлэх ухааны сайд Л.Энх-Амгалан,

9. Барилга, хот байгуулалтын сайд Л.Мөнхбаатар

10. Эрүүл мэндийн сайд С.Энхболд нарыг үргэлжлүүлэн ажиллуулах нь зүйтэй гэж үзжээ.

Тэрээр мерит зармыг баримтлан Байнгын хороодын зарим даргыг сайдаар томилох санал гаргаж байгаагаа хэлсэн бөгөөд сайд бол албан тушаал биш, цаг нартай уралдан асуудлыг шийдвэрлэж, гал барилцах улс төрийн манлайлагчид байх учиртай гэдгийг онцолсон юм.

Харин Засгийн газрын гишүүдийг шинээр томилох, чөлөөлөх бүрэн эрхийнхээ хүрээнд:

• ЗГХЭГ-ын дарга бөгөөд сайдаар Д.Амарбаясгалан

• Эдийн засгийн хөгжлийн сайдаар Ч.Хүрэлбаатар

• УУХҮ-ийн сайдаар Ж.Ганбаатар

• Эрчим хүчний сайдаар Б.Чойжилсүрэн

• ХНХ-ын сайдаар Д.Сарангэрэл

• ЗТХ-ийн сайдаар Д.Бямбацогт

• Цахим хөгжил, харилцаа холбооны сайдаар Н.Учрал

• ХХААХҮ-ийн сайд Х.Болорчулуун нарыг томилов. 

Мөн яам байхгүй буюу асуудал эрхэлсэн сайдаар:

• Нийслэлийн асуудал эрхэлсэн сайдаар Ж.Сүхбаатар

• Спорт, олимпизмын асуудал эрхэлсэн сайдаар Б.Бат-Эрдэнэ нарыг тус тус томилхоор боллоо.