УИХ-ын гишүүн О.Цогтгэрэл, Ц.Туваан, С.Одонтуяа, Ш.Адьшаа нарыг намын гишүүнчлэлээс хасч, УИХ дахь АН-ын бүлгийг татан буулгасан талаар АН-ын дарга С.Эрдэнэ Төрийн ордонд мэдээлэл хийлээ.

Тэрээр "АН-ын дотоод үйл хэрэгт хөндлөнгөөс бүдүүлгээр оролцох нь хэвээр байгаа тул УИХ дахь АН-ын бүлгийг татан буулгасан" гэж онцоллоо.

Тус шийдвэрийг УИХ-ын дарга Г.Занданшатарт хүргүүлсэн бөгөөд цаашид УИХ дахь АН-ын бүлэг үйл ажиллагаа явуулахгүй болсныг мэдэгдэв. 

Хэвлэлийн хурлын үеэр АН-ын Ерөнхий нарийн бичгийн дарга Ч.Өнөрбаяр "Бид эрхбаригчдын тоглоомын бүлэгтэй байснаас бүлэггүй байсан нь дээр. Өмнө нь АН зөвлөлтэй байсан түүх бий. Бүлэг байх, зөвлөл байх нь чухал биш. МАН-д Эрүүл мэндийн сайдаар ажиллах хүн алга уу?! Олдохгүй байгаа бол огцор. Л.Оюун-Эрдэнийн Засгийн газар хариуцлагаа бүрэн хүлээж, өөрсдөө шинэ танхимаа бүрдүүлэх ёстой. АН-аас шинэ танхимд орохоор ярьж явсан гишүүдээ бид намын гишүүнээс хаслаа. УИХ-ын гишүүн О.Цогтгэрэл, Ц.Туваан, С.Одонтуяа, Ш.Адьшаа нар намын төлөөлөхгүй. Эрх баригчдын хийж чадахгүй байгаа ажлын төлөө АН хариуцлага хүлээхгүй" гэлээ. 

Харин УИХ-ын гишүүн Д.Ганбат "Сандал ширээний төлөө ширүүн тэмцэл өрнөж байна. Үндсэн хуулийн цэцийн шийдвэр эмх замбараагүй байдал үүсгэсэн. Цаашид УИХ Засгийн газраа хянаж чадахааргүй боллоо. АН-ын зөвлөлд УИХ-ын гишүүн Б.Бат-Эрдэнэ, Д.Ганбат, А.Адъяасүрэн, С.Ганбаатар нар үлдэж ажиллана. Хэрэв АН Засгийн газрын бүрэлдэхүүнд багтвал сонгогчид бидэнд итгэхгүй" гэлээ.