Ардчилсан намын удирдлагууд цаг үеийн асуудлаар мэдээлэл хийлээ.

Ардчилсан Намын ерөнхий нарийн бичгийн дарга Ч.Өнөрбаяр: Өчигдөр Монгол Улсад хууль байхгүй гэдгийг нотолсон үйл явдал боллоо. Эрх баригчид Үндсэн хуулийн дээгүүр яаж гишгэж байгаагаа ил тод харууллаа. Хууль дээдлэх зарчим булшлагдаж байгаа гэдэг үүднээс харамсалтай байна. УИХ бүлгийн даргыг сонгохтой холбоотой хууль баталсан. Бүлгийн нийт гишүүдийн олонхоор бүлгийн даргыг сонгож, чөлөөлөх асуудал юм.

Гэтэл зургаан гишүүн оролцоод бүлгийн дарга сонгосныг УИХ-ын дарга Г.Занданшатар баталгаажуулж, уншиж сонсгож байна. Нийт гишүүн гэдэг нь бүлгийн бүх гишүүнийг хэлэлцэх болохоос биш зургаан гишүүнийг хэлэхгүй. Энэ тохиолдлыг яагаад нийт гишүүн гэж үзэж байгааг Г.Занданшатараас асуумаар байна. Үнэхээр нүүр улаалаа. Хууль зөрчиж гаргаж ирсэн тоглоомын бүлгийн даргадаа яаж Үндсэн хуулийг дээдэлж ажиллаарай гэж захиж чадаж байна аа.

Ийм байдлаар АН-ын бүлэг болон хууль дээдлэх зарчмаар тоглож байгаа нь харагдаж байна.

УИХ-ын дарга Г.Занданшатар өөрөө өргөдлөө өгөөд огцрох хэмжээний асуудал гэж үзэж байна. Өргөдлөө өг. Эрх баригчдын үг, үйлдэл зарчим нь яагаад дандаа зөрдөг юм. Монголын ард түмэн санах ойтой бүгдийг мэдэж байгаа. Та нар улс төрийн тавцангаас бүхэлдээ арчигдаж магадгүй, нэг л өдөр улс төрийн хариуцлага бууна.

Үндсэн хуульд нэмэлт өөрчлөлт оруулахад АН-ын тоглоомын бүлэг эрх баригчдад хэрэгтэй. Зориудаар тоглоомын бүлэг гаргаж ирээд дараа нь санал гаргах гэж байгаа. Тэр дүрд нь хамгийн сайн тоглож чадах хүн нь О.Цогтгэрэлийг гэж үзэж байгаа юм байна" гэлээ.