Найман жил үргэлжилж дэлхий нийтийг байлдан дагуулж, олон сая үнэнч үзэгчидтэй болсон “HBO” сувгийн цуврал бүтээл “Хаадын тоглоом” буюу “Game of Thrones” албан ёсоор өндөрлөлөө. Төгсгөлийн бүлгийн сүүлийн анги өчигдөр Улаанбаатарын цагаар өглөөний 9:00 цагт цацагдсан юм.
Уг цувралын сүүлийн зургаадугаар ангийг “HBO” сувгийн түүхэнд хамгийн олон буюу 19 сая гаруй хүн үзсэн байна.
“HBO” сувгийн мэдээлснээр, “The Iron Throne” ангийг өнгөрсөн ням гаригт шууд цацагдах үеэр “HBO” суваг болон “HBO GO”, “HBO NOW” хавсралтаар дамжуулан үзсэн үзэгчдийн тоо 19.3 саяд хүрсэн нь долоо хоногийн өмнө гарсан тавдугаар ангийн үзэгчдийн /18.4 сая/ үзүүлэлтийг шинэчлэн тогтоожээ.
Энэхүү амжилтыг 2002 онд үзэгчдийн хүртээл болсон гэмт хэргийн ертөнцийн талаар өгүүлдэг “The Sopranos” цуврал эзэмшиж байжээ.
“Game of Thrones” цуврал дэлхий даяар 150 гаруй оронд гардаг боловч тэдгээр орны бүх үзүүлэлтийг тооцоолоход бэрхшээл тулгардаг байна.
Харин өнгөрсөн долоо хоногт буюу төгсгөлийн бүлгийн тавдугаар анги буюу “The Bells” цацагдсанаас эхлэн тус цувралын үзэгч, фенүүд анги бүр дээр сэтгэл дундуур байгаагаа илэрхийлж төгсгөлийн бүлгийг дахин хийхийг уриалсан цахим өргөх бичигт гарын үсэг цуглуулж эхэлсэн юм. Одоогийн байдлаар цахим өргөх бичигт 1,3 сая гаруй хүн гарын үсэг зуржээ.
