/RIA Novosti/ Сербийн Ерөнхийлөгч Александр Вучич албан тушаалаасаа огцорч буйгаа ням гаригт мэдэгдэж, холбогдох баримт бичигт гарын үсэг зуржээ. Тэрбээр парламентын ээлжит бус сонгуульд оролцож, Ерөнхий сайдын албан тушаалд өрсөлдөх зорилгоор ийм шийдвэр гаргасан байна.
А.Вучич Сербийн Ерөнхийлөгчийн албыг 2017 оны тавдугаар сарын 31-нээс хойш хашиж байгаа бөгөөд 2022 оны дөрөвдүгээр сард улиран сонгогджээ. Түүний бүрэн эрхийн хоёр дахь хугацаа 2027 оны дундуур дуусах байв. Сербийн Үндсэн хуулиар нэг хүн төрийн тэргүүний албан тушаалыг хоёроос дээш удаа хашихыг хориглодог.
А.Вучич есдүгээр сарын эхээр тус улсын нэг танхимтай парламент болох Ардын ассамблейг тарааж, ээлжит бус сонгуулийг аравдугаар сарын 25-нд явуулахаар товлосон байна. Сербийн эрх баригч Дэвшилтэт нам А.Вучичийг “Нэгдсэн Серби” эвслийн сонгуулийн жагсаалтыг тэргүүлж буйг, мөн сонгуульд ялсан тохиолдолд Ерөнхий сайдад нэр дэвшинэ гэдгийг баталжээ.
Сербийн Ерөнхийлөгчийн үүргийг парламентын дарга Ана Брнабич түр орлон гүйцэтгэнэ. А.Вучич өмнө нь албан тушаалаасаа огцорч, парламентын ээлжит бус сонгуульд жирийн иргэний хувиар оролцохоор бэлтгэнэ гэж есдүгээр сарын сүүлчээр мэдэгдэж байсан юм.
