Булган, Сэлэнгэ, Төв аймгийн зарим, Хэнтий, Дорнодын хойд сумдын нутгаар өнөөдөр цас орж, шуурснаас халтиргаа гулгаа үүсэж болзошгүйг ЦУОШГ-аас анхааруулж байна.
Нутгийн хойд хэсгээр үүлшиж, Архангайн зүүн, Хөвсгөл, Булган, Төв, Сэлэнгийн зарим, Ховд, Говь-Алтай, Хэнтий, Дорнодын хойд сумдын нутгаар бороо, уулаараа цас орно. Бусад нутгаар солигдмол үүлтэй, хур тунадас орохгүй. Салхи нутгийн зүүн хагаст баруун өмнөөс баруун хойш эргэж, бусад нутгаар баруун хойноос секундэд 5-10, нутгийн зарим газраар секундэд 14-16 метр хүрч ширүүснэ.
Нутгийн хойд хэсгээр хүйтэрч Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс, Туул, Тэрэлж голын хөндийгөөр 2-7, Алтайн өвөр говиор 19-24, говийн бүс нутгийн өмнөд хэсгээр 14-19, бусад нутгаар 7-12 хэм дулаан байна.
Улаанбаатар, Багануур, Тэрэлж орчмоор үүлшиж, ялимгүй хур тунадас орно. Салхи баруун хойноос секундэд 5-10, зарим үед 12-15 метр хүрч ширүүснэ. Нийслэл болон Багануурт өдөртөө 4-6, Тэрэлж орчмоор 2-4 хэм дулаан байна.
