Тайванийн өмнөд хэсгийг дайрсан хар салхины улмаас усархаг аадар бороо орж, өнөөдөр таван сая гаруй хүн ажил, сургуульдаа явч чадахгүйд хүрч, мөн үер буусны улмаас төмөр замын гол шугамын нэг хэсэг сэтэрчээ.
Одоогоор Японы өмнөд хэсгийн Рюкю арлуудыг дайран өнгөрч буй "Меккала" хар салхи Тайванийг бүхэлд нь дайраагүй ч тус арлын зарим хэсэгт, ялангуяа өмнөд нутгийн Гаошюн, Тайнань болон Пиндун хотуудад их хэмжээний аадар бороо дагуулаад байна.
Таван сая гаруй хүн оршин суудаг дээрх гурван хотын захиргаа өнөөдөр бүх албан байгууллага, сургуулийн үйл ажиллагааг түр зогсоожээ.
Тайнань хотод хүчтэй үер буусны улмаас хойд болон өмнөд хэсгийг холбосон төмөр замын гол шугамын нэг хэсгийг хаажээ. Харин тусдаа үйл ажиллагаа явуулдаг өндөр хурдны галт тэрэгний шугамд ямар нэгэн саатал гараагүйг албаныхан мэдээлсэн байна.
Одоогоор хүний амь нас хохирсон талаар мэдээлэл ирээгүй байна. Тайванийн зүүн эргийн Хуалянь шянийн эрх баригчид уулархаг бүсийн хурдацтай дүүрч буй нуурын доод хэсэгт орших хоёр суурингаас 200 орчим оршин суугчийг нүүлгэн шилжүүлж байгаа талаар мэдээлжээ.
Reuters
