Олон улсын олимпын хороо (ОУОХ) улс төрийн хувьд төвийг сахих зарчимтай холбоотой Олимпын хартийн нэмэлт өөрчлөлтийг баталлаа. ОУОХ-ны Гүйцэтгэх хорооноос санал болгосон уг өөрчлөлтийг лхагва гаригт Женевт болсон хурлаар баталсан байна. 

Олимпын хартид оруулсан нэмэлт өөрчлөлтүүд спорт нь улс төрийн оролцооноос ангид байх ёстой гэсэн заалтуудыг улам чангатгаж байна. Тухайлбал, "төр, соёл, нийгэм, эдийн засгийн байгууллага бүтцээс ирэх аливаа шахалт шаардлагаас ангид байж, хэзээд төвийг сахих" зарчмыг хангахад ОУОХ голлох үүрэгтэйг тодотгожээ. Мөн Олимпын хартийн 5 дугаар зүйлд "Олимпын хөдөлгөөнд багтдаг спортын байгууллагууд ямар ч үед төвийг сахих зарчмыг баримтлах үүрэгтэй" гэдгийг шинээр тусгасан байна. 

Энэхүү шинэчлэл нь тамирчид болон тэмцээн уралдааныг гадны оролцоо нөлөөллөөс хамгаалах, Олимпын наадмыг улс төрийн зорилгоор ашиглахыг таслан зогсоох зорилготой гэж ОУОХ-ноос мэдээлэв. ОУОХ-ны тэргүүн Кирсти Ковентригийн хэлснээр, төвийг сахих тухай нэмэлт өөрчлөлтүүд нь "Олимпын наадмыг онцгой болгодог спортоор дамжуулан дэлхий дахиныг нэгтгэх үйлсийг хамгаалах" зорилготой ажээ.

"Бид Олимпын наадмыг онцгой болгодог хамгийн чухал үнэт зүйлсийн нэг болох дэлхийн өнцөг булан бүрээс ирсэн тамирчид тэмцээн уралдаанд эв найрамдалтайгаар өрсөлдөх боломжийг хамгаалахыг эрмэлзэж байна. Спорт төвийг сахисан орон зай хэвээр үлдэж, тамирчин бүрийг нээлттэй хүлээн авч, бүгдэд ижил хүндэтгэл үзүүлж, үзэл бодлын зөрүүтэй байсан хэдий ч нэгдэж чадсан тохиолдолд л эл үнэт зүйлийг хадгалах боломжтой. Олимпын наадамд оролцох эсэх нь улс төрөөр бус, спортын амжилтаар шийдэгдэх учиртай" гэж тэрбээр цохон тэмдэглэсэн байна.

Энэхүү шийдвэр нь Оросын тамирчдыг олон улсын тэмцээнд дахин оролцох замыг нээж байгаа эсэх тухай асуултад Ковентри хариулахдаа, ОУОХ-нд эдгээр өөрчлөлтийг тамирчдын хувьд хэрхэн хэрэгжүүлэхийг тодорхойлоход хугацаа шаардлагатай гэж мэдэгджээ. 

ОУОХ-ны хурлын өмнө тамирчид улс төрийн хувьд төвийг сахихтай холбоотой нэмэлт өөрчлөлт оруулах нь Оросын тамирчдыг олон улсын спортын тэмцээн уралдаанд оролцоход тавьсан хязгаарлалтуудыг сулруулах вий гэсэн болгоомжлол үүсжээ. 

"Global Athlete" хүний ​​эрхийн байгууллагын ерөнхий захирал Роб Келер ОУОХ-ны эл шийдвэр нь олимпын хөдөлгөөнийг сулруулах эрсдэлтэй гэж үзэж байгаагаа илэрхийлсэн байна. "Дайн, системтэй допинг, Олимпын хартиг удаа дараа зөрчсөн тохиолдолд цаашид тэмцээнд бүрэн хэмжээгээр оролцоход саад болохгүй гэсэн маш тодорхой дохиог энэ шийдвэр өгч байна" гэж тэрбээр мэдэгджээ. 

2014 оны Сочийн өвлийн Олимпын наадмын дараа допингтой холбоотой дуулианы улмаас Оросын тамирчдын олон улсын тэмцээнд оролцох эрхийг хязгаарласан юм. 2022 онд ОХУ-ын цэргүүд Украин руу довтолсонтой холбоотойгоор Орос, Беларусийн тамирчдыг олон улсын тэмцээнүүдээс хассан билээ. 

Украины эзлэгдсэн бүс нутгуудын олимпын зөвлөлүүдийг өөрийн бүрэлдэхүүнд нэтгэсний дараа буюу 2023 оны 10 дугаар сард Оросын олимпын хорооны үйл ажиллагааг түр зогсоосон. ОУОХ уг шийдвэрийг Олимпын харти болон Украины нутаг дэвсгэрийн бүрэн бүтэн байдлыг зөрчсөн үйлдэл гэж үзсэн юм. 

Өнгөрсөн тавдугаар сард ОУОХ Беларусийн тамирчдад тавиад байсан бүх хязгаарлалтыг цуцалснаар тус улсын тамирчид 2028 оны Лос-Анжелесийн Олимпын наадмын эрх олгох тэмцээнүүд зэрэг олон улсын тэмцээн уралдаанд оролцох зам нээгджээ. Үүний зэрэгцээ, ирэх саруудад Оросын тамирчдын хувьд мөн адил шийдвэр гарч магадгүй гэж таамаглаж байна. Оросын тамирчдыг тэмцээн уралдаанд оролцуулах шийдвэрийг олон улсын спортын зарим холбоод хэдийн бие даан гаргаад байгаа юм.