АНУ-ын Хууль зүйн яамнаас "Paramount" компани "Warner Bros. Discovery"-ийг худалдаж авахыг зөвшөөрчээ. Хэлцлийн нийт өртөг 111 тэрбум ам.доллароор үнэлэгдэж байгаа юм. Нэгдэх үйл явц бүрэн дууссаны дараа "Paramount" компани "CNN", "HBO", "DC Studios", "New Line Cinema" зэрэг "Warner Bros. Discovery"-ийн хэд хэдэн алдартай хөрөнгийг эзэмшинэ. 

АНУ-ын Хууль зүйн яамныхны үзэж байгаагаар, тус хоёр компани нэгдсэнээр хэвлэл мэдээлэл, энтертайнмент салбарын өрсөлдөөн улам ширүүн болж, салбарын хөгжилд нэмэлт боломжуудыг бий болгох ажээ. Одоогоор нэгдэх үйл явц хараахан дуусаагүй байна. Калифорни зэрэг зарим муж улс уг хэлцлийг эсэргүүцэн шүүхээр заргалдаж магадгүй байгаа юм.

Калифорни муж улсын Ерөнхий прокурор Роб Бонта урьд нь мэдэгдэхдээ, энтертайнмент салбарын томоохон компаниуд нэгдсээр байгаад санаа зовж буйгаа илэрхийлж байв. Түүний үзэж буйгаар, зах зээлд томоохон тоглогчдын тоо цөөрөх нь өрсөлдөөнд сөргөөр нөлөөлөөд зогсохгүй ажлын байрны цомхотголд хэдийнээ өртөөд байгаа хөдөлмөрийн зах зээлд улам дарамт болно.

Түүнчлэн тус хоёр компани нэгдэж байгаа нь кино урлагийн салбарынхны дунд мөн ихээхэн маргаан дагуулаад байна. Өнгөрсөн дөрөвдүгээр сард Холливудын 1400 гаруй жүжигчин, найруулагч болон бусад зүтгэлтнүүд нэгдэхийг эсэргүүцсэн нээлттэй захидалд гарын үсэг зуржээ. Харин "Paramount" компанийн удирдлагуудын хувьд активуудаа нэгтгэж, зардлаа оновчтой болгосноор эдийн засгийн маш том үр өгөөж хүртэнэ гэж тооцоолж байна.

ВВС