Парацетамол эм нь ургийн мэдрэлийн тогтолцооны хөгжилд хэрхэн нөлөөлдөг болохыг тодорхойлох зорилгоор хийсэн бүх клиник судалгааны дүнг олон улсын эмч нарын баг нэгтгэн, дүн шинжилгээ хийжээ. Энэ тухай Лондоны Сент-Жоржийн их сургуулийн хэвлэлийн алба мэдээлсэн байна.  

Уг эмийг хэрэглэх нь аутизм, анхаарал сарнилтын хам шинж болон оюуны хөгжлийг саатуулагч бусад төрлийн өвчин үүсэх  эрсдэлийг нэмэгдүүлдэг гэдгийг батлах ямар ч нотолгоо олдоогүй хэмээн эмч нар хэллээ.

“Бидний хийсэн судалгаагаар, парацетамол нь эмч нарын заавраар хэрэглэж буй тохиолдолд жирэмсэн эмэгтэйчүүдэд аюулгүй болох нь батлагдсан. Жирэмсэн эхчүүд халуурах, өвдөлт даамжрах үед парацетамол бол нэн түрүүнд хэрэглэдэг эм учраас уг эм эрсдэл үүсгэдэг эсэхийг тодорхойлж чадсан нь маш чухал алхам” хэмээн Лондоны Сент-Жоржийн их сургуулийн профессор Асма Халил онцлон дурдав.

Түүний ярьснаар, жирэмсэн эмэгтэйчүүд парацетамолыг хэрэглэх нь ургийн хөгжилд сөргөөр нөлөөлдөг эсэх тухай мэтгэлцээн сүүлийн хэдэн арван жилийн туршид эмч нарын дунд өрнөж байгаа ажээ. Ялангуяа өнгөрсөн оны эцсээр АНУ-ын Ерөнхийлөгч Д.Трамп, Эрүүл мэндийн сайд бага Роберт Кеннеди нар мэдэгдэхдээ “парацетамол нь аутизм үүсэхэд нөлөөлдөг” гэснээс хойш маргаан мэтгэлцээн улам ширүүссэн байна.

Үүнээс үүдэн парацетамолын урагт нөлөөлдөг эсэх талаар хийсэн бүх судалгааны дүнг нэгтгэн, тэдгээрт дүн шинжилгээ хийхээр олон улсын эмч нарын баг шийдвэрлэжээ. Ингээд 1 сая гаруй эхчүүд ба тэдний хүүхдүүдийг оролцуулсан 43 судалгааны дүнг нарийвчлан судалсан байна.

Судалгааны дүнд, парацетамол нь аутизм, анхаарал сарнилтын хам шинж болон оуюны хөгжлийг саатуулдаг бусад төрлийн эрсдэлийг нэмэгдүүлсэн эсвэл бууруулсан гэх ямар ч нотолгоо олдоогүй ажээ. Дүн шинжилгээ хийх явцад генийн ялгаатай байдал, нийгэм-эдийн засгийн онцлог болон судалгаанд нөлөөлж болох бусад хүчин зүйлийг харгалзан үзсэн байна. 

Харин өмнө нь хийсэн судалгаануудын явцад аутизм үүсэх ялигүй эрсдэл байсныг тодорхойлсон боловч жирэмсэн эмэгтэйчүүдийн генийн онцлог, архаг өвчтэй эсэх болон дааврын тогтолцооны үйл ажиллагаанд саатал учруулах магадлалтай бусад хүчин зүйлийг харгалзан үзээгүй ажээ.   

ТАСС