МОНЦАМЭ агентлагийн “Хүмүүн бичиг” сониноос жил бүр уламжлал болгон зохион байгуулдаг “Монгол сайхан бичигтэн” уралдаан олон улсын чанартай болоод гурав дахь жилийнхээ нүүрийг үзэж байна.
Энэ жилийн тухайд БНХАУ, ОХУ, АНУ, зэрэг орны 25 оролцогч бүтээлээ ирүүлжээ. Тэдгээрээс АНУ-аас Монгол Улсад суугаа Онц бөгөөд Бүрэн эрхт Элчин сайд Ричард Буанган тусгай байр эзэлсэн юм. Түүний шагналыг АНУ-аас Монгол Улсад суугаа Элчин сайдын яамны Хоёрдугаар нарийн бичгийн дарга Жон Конард гардан авлаа. Энэ үеэр түүнтэй цөөн хором ярилцав.
Тэрбээр “Манай яамнаас энэ жил гурван хүн энэхүү уралдаанд оролцсон юм. Тэд Монголын уламжлалт бичгийг сурахын тулд нэг жилээс илүү хугацаанд бэлтгэл хийсэн. Элчин сайд болон хоёр ажилтны хувьд бичих, хатгах зэрэг аргаар бүтээлээ хийхэд ойролцоогоор нэг сарын хугацаа зарцууллаа. Нэг бүтээлийг олон дахин засаж, дахин дахин туршиж илүү сайжруулахыг зорьсон тул багадаа нэг сар болдог юм билээ. Элчин сайд Ричард Буанган Монгол Улсад бараг гурван жил ажиллаж байгаа. Анх ирсэн цагаасаа л хэлний багш нартайгаа хамтран монгол хэл суралцаж ирсэн. Монгол бичгийг нэг жилээс илүү хугацаанд тууштай сурч байгаа юм. Тэр энэ уралдаанд оролцсондоо маш их баяртай байгаа. Анх эхэлж байсан үеэсээ хэчнээн их зүтгэл гаргасныг нь би сайн мэднэ. Сүүлийн нэг жилийн хугацаанд бичих ур чадвараа сайжруулах, илүү уян хатан, чөлөөтэй бичиж сурахын төлөө ихээхэн чармайлт гаргасан. Монгол хэлээр мэндчилгээ, энгийн бичвэрүүд бичиж чаддаг болж байгаа нь түүний хувьд том ахиц юм.
Тэр Монгол Улсад ажиллаж байх хугацаандаа, цаашлаад боломж гарвал хожим ч гэсэн монгол бичгээ үргэлжлүүлэн суралцах хүсэлтэй байгаа. Монгол бичиг маш хэцүү учраас энэ хэмжээнд сурч чадсандаа сэтгэл ханамж өндөр, бахархал төрсөн. Тиймээс энэхүү уралдаанд оролцохыг хүссэн. Энд маш өндөр түвшний чанартай бүтээл олон байна. Үнэндээ жинхэнэ утгаараа бүтээлүүдийг дэлгэжээ. Оролцогч бүрийн бүтээл өөр өөрийн онцлогтой. Нэг оролцогч бүсгүй зураг зурж, Монголын хээр тал, уулс, Говийн байгалийг дүрсэлж түүн дээрээ монгол бичгээр бичихэд нэг сар гаруй хугацаа зарцуулсан байна. Түүний хувьд зургаа зурчихаад дээр нь алдаа гаргахгүй бичнэ гэдэг маш их айдастай байсан болов уу” хэмээн ярилаа.
“Монголын сайхан бичигтэн” үзэсгэлэн Монголын Уран зургийн галерейд энэ сарын 18-ныг хүртэл олны хүртээл болно. Тус үзэсгэлэнгээс Монгол туургатны болон бусад гадаад улсын иргэд, монгол бичигтнүүд” ангиллын шилдэг таван бүтээлийг дэлгэснийг үзэх боломжтой. АНУ-ын Элчин сайдын яамнаас оролцсон оролцогчдын бүтээлийг танилцуулъя.
