Үндэсний онцлог бүхий эмчилгээний онол, арга зүйгээр хүн төрөлхтнийг эмчлэн анагаах, Монгол Улсын хүн амын удмын санг хамгаалах, монголын уламжлалт анагаах ухааны мэдлэгийн дундаршгүй сан хөмрөгийг судлан хөгжүүлэх,  ололт амжилтыг нь олон улсад түгээн дэлгэрүүлэх зорилгоор Монгол Улсын Ерөнхийлөгч өнөөдөр зарлиг гаргасан. Энэ талаар АШУҮИС ректор, АУ-ны доктор, профессор Б.Дамдиндоржоос тодрууллаа.

Тэрбээр, “АШУҮИС нь Монгол Улсын эрүүл мэндийн салбарт ажиллаж буй нийт эмч, эмнэлгийн мэргэжилтэн, сувилагч нарын 90 гаруй хувийг дангаараа бэлтгэсэн үндэсний ууган их сургууль юм. Тус сургууль монгол анагаах ухааныг хөгжүүлэх, уламжлалт анагаах ухааны соёл, оношилгоо, эмчилгээний арга зүйг нотолгоонд суурилан боловсронгуй болгож, орчин үеийн шинжлэх ухааны ололт дэвшилтэй уялдуулан хөгжүүлэх чиглэлийг тууштай баримталж ирсэн.

Тухайлбал, АШУҮИС 1990 оноос анх уламжлалт анагаах ухааны их эмчийг бэлтгэж эхэлсэн. Үүнээс хойш 1400 гаруй эмч, эмнэлгийн мэргэжилтнийг бэлтгэн гаргасан юм. Эдгээр төгсөгч төрийн болон хувийн хэвшил, олон улсад эзэмшсэн мэргэжлээрээ ажиллаж, эмнэлгийн тусламж үйлчилгээ, эрдэм шинжилгээ судалгаанд идэвхтэй оролцсоор ирсэн.

Өнөөдрийн байдлаар энэ салбараас гурван академич, 300 гаруй доктор, 700 гаруй магистр төрөн гарсан нь нөөц, бололцоо байгааг харуулж байна.

Түүнчлэн олон мянган жилийн түүхтэй уламжлалт анагаах ухааны мэдлэгийг орчин үеийн технологи, молекул биологи болон бусад шинжлэх ухааны салбарын томоохон судалгаагаар нотлон баталж, нотлогдсон үр дүнг эмчилгээ, үйлчилгээний практикт нэвтрүүлэх чиглэлд ажиллаж байна.

Цаашид уламжлалт анагаах ухааныг орчин үеийн нэгдмэл анагаах ухааны хэлбэрээр хөгжүүлэх, судалгаа шинжилгээний нарийн арга зүйг нейросайнс, молекул биологи, генетик зэрэг шинжлэх ухааны салбартай нягт уялдуулан хэрэгжүүлэх зорьж байна.

Үүнд инновац, өндөр технологийн дамжуулалтыг хэрэгжүүлснээр сургалт, эрдэм шинжилгээ, эмнэлгийн тусламж үйлчилгээний чанарыг дээшлүүлж, монгол анагаах ухааны нэр хүндийг олон улсад таниулахыг зорьж байна.

Шинжлэх ухаанд шинэ мэдлэг нэмэх маш том боломж манай сургуулийн эрдэмтэн судлаачдад бий. Нобелийн шагналтан уламжлалт анагаах ухааны өв соёлоор дамжин уламжилж ирсэн оношилгоо, эмчилгээний арга техникийг орчин үеийн анагаах ухааны дэвшилтэт судалгаа, шинжилгээний үр дүнгээр нотлон баталж, хүний амь насыг авран хамгаалах, насжилтыг уртасгах, эрүүл урт наслах, аз жаргалтай байх, сэтгэлийн амар амгалан, сэтгэц, сэтгэлийн эрүүл мэндийн хувьд хүн зөв сайхан амьдрах боломж монгол анагаах ухаанд байгаа.

Үүнийг Монгол Улсын Ерөнхийлөгч У.Хүрэлсүхийн дэмжлэгээр батлагдсан холбогдох зарлигтай уялдан хэрэгжүүлэх юм. Ингэснээр монгол анагаах ухааны хөгжил эрчимжиж, эрүүл мэндийн салбарт бодитой ахиц дэвшил гаргахаас гадна олон улсад монгол анагаах ухааныг таниулан түгээн дэлгэрүүлэхэд том түлхэц болно” хэмээн ярилаа.