Автомашины олимп гэгдэх “Дакар ралли” уралдаанд уралдаж буй хоёр тамирчныхаа явцын мэдээллийг МОНЦАМЭ агентлаг өдөр бүр уншигчдадаа хүргэж буй.

Өчигдөр ес дэх гараа өндөрлөлөө. Тус уралдааны хоёрдугаар хагасын марафон гарааны эхний өдөр “Тал нутгаас Дакарт” төслийн тамирчин Э.Халиунболд 4 цаг 6 минут 43 секундээр нийт тамирчдаас 16, Ралли-2 төрөлдөө долоодугаар байраар хаав. Уг нь манай тамирчин 14 дүгээр байраар бариалсан ч нэг минутын торгууль нэмэгдсэнээр 16 болж өөрчлөгджээ. Тэрбээр эхний 196 км хүртэл манай тамирчин шилдэг 10 дотор цаг үзүүлж, дэмжигчдээ баярлуулав.

Тэгвэл олон улсын хэмжээний мастер П.Мөрөн 4 цаг 30 минут 26 секундээр нийлбэр дүнгээр 33, Ралли-2 ангилалдаа 22 дугаарт бичигдэж байна. Энэ гараанд мотоциклийн тамирчдаас Испанийн тамирчин Тоша Шарейна тэргүүлэв. Тэрбээр уралдаан эхэлснээс хойш анх удаа тэргүүн байр эзэлж байгаа нь энэ. Австралийн Даниел Сандерс дахин дэд байрт шалгарсан бол Саудын Арабын тамирчин Майкл Дочерти гуравдугаар байраар хурдаллаа.

Өнөөдөр тамирчид хээрийн түр хоног баазаас Биша хотын зүг хүлгийн жолоо зална. Нийт замын урт нь 418 км бол уралдааны цаг тооцох нь 371 км байх нь ээ. Замын онцлогоос дурдвал шороо 34, элс 28, элсэн манхан 34, хад чулуутай хэсэг 4.0 хувийг эзэлж байгаа юм. Нийт 14 гараатай уралдаан дуусахад дөрвөн гараа үлдлээ.