“Долоогийн бүлэг”-ийн /G7/ орнуудын Сангийн сайд нар чухал ашигт малтмалын салбарт Хятадаас хэт хамааралт байдлыг аль болох богино хугацаанд багасгахаар тохиролцсон тухай Японы Сангийн сайд Сацүки Катаяма мэдэгдлээ.

Вашингтон хотод болсон уулзалтад Австрали, Энэтхэг, БНСУ зэрэг G7-д багтдаггүй орнуудын төлөөлөгчид мөн оролцсон байна. Японы Сангийн сайд Сацүки Катаяма уг хэлэлцээрийг албан ёсоор танилцуулжээ.

АНУ-ын Сангийн яамнаас мэдээлснээр, уулзалтын явцад оролцогчид “чухал эрдэс бодисын нийлүүлэлтийн сүлжээнд байгаа гол эмзэг байдлыг нэн даруй шийдвэрлэх эрмэлзэлтэй байгаагаа” илэрхийлсэн байна. АНУ-ын Сангийн сайд Скотт Бессентийн зохион байгуулсан энэхүү уулзалт нь Хятад улс газрын ховор металлыг боловсруулах салбарт давамгайлах байр сууриа дипломат болон эдийн засгийн шахалт үзүүлэх зорилгоор улам өргөнөөр ашиглаж буй үед боллоо.

Катаяма мөн сэтгүүлчдэд мэдээлэл хийхдээ, Хятадын экспортын хяналтын талаар баримталж буй Японы байр суурь, мөн 2010 онд Хятадын талаас газрын ховор элементийн экспортод тавьсан хоригийг даван туулах явцад олж авсан туршлагаа уулзалтад оролцогчидтой хуваалцснаа дурджээ.

Японы Ерөнхий сайд Такаичи Санаэ өнгөрсөн оны 11 дүгээр сард парламентад Тайваньтай холбоотой үг хэлсний дараа Бээжингийн зүгээс Токиогийн эсрэг арга хэмжээнүүдийг авч эхлээд байгаа юм.

Хятадын эрх баригчид Япон руу экспортлох газрын ховор элементүүд зэрэг цэргийн болон иргэний зориулалтаар ашиглаж болох давхар зориулалттай бараа бүтээгдэхүүнд тавих хяналтаа өнгөрсөн долоо хоногт чангатгасан юм.

Дэвшилтэт технологи, батлан хамгаалах салбарын бүтээгдэхүүн үйлдвэрлэхэд ашигладаг, дэлхийн газрын ховор элементийн нөөцийн 70 орчим хувь нь Хятадад ногддог. Тус улсад мөн түүхий эдийн ойролцоогоор 90 хувийг боловсруулдаг байна.

Өнгөрсөн онд Хятадын эрх баригчид АНУ руу экспортолдог газрын ховор элементэд хязгаарлалт тавьсан бөгөөд энэ нь АНУ-ын Ерөнхийлөгч Д.Трампын засаг захиргаатай хийж буй худалдааны хэлэлцээнд давуу тал олж авах зорилготой байсан гэж ажиглагчид дүгнэж байв.

Гэсэн хэдий ч Трамп өнгөрсөн оны 10 дугаар сарын сүүлчээр Өмнөд Солонгост Хятадын удирдагч Ши Жиньпинтэй уулзсаны үр дүнд худалдааны зарим арга хэмжээг зөөлрүүлж, Бээжингийн зүгээс газрын ховор элементийн экспортод тавих хяналтыг нэг жилийн хугацаагаар зогсоохоор тохиролцсон юм.

Эдийн засгийн аюулгүй байдалд учирч буй эрсдлийг бууруулах хамтарсан арга хэмжээний хүрээнд ашигт малтмалын хомсдолд мониторинг хийх, зах зээлд зориудаар эмх замбараагүй байдал үүсгэсэн үйлдэлд авах хариу арга хэмжээг уялдуулан зохицуулах төлөвлөгөөг боловсруулжээ.

Эх сурвалж: Kyodo