Тэртээ 1930-аад оны үеийн Британийн засаглалын эсрэг палестинчуудын бослогыг харуулсан “Палестин 36” кино Токиогийн олон улсын кино наадмын дээд шагнал буюу Токиогийн Гран-При шагналыг хүртлээ.
Ази тивийн хамгийн том кино наадмуудын нэг болох Токиогийн олон улсын 38 дахь удаагийн кино наадам 10 дугаар сарын 27-нд эхэлсэн юм. Нийт 10 хоногийн турш үргэлжилсэн үйл ажиллагааны үеэр Японы болон гадаадын 184 киног үзүүлжээ.
Лхагва гарагт буюу наадмын сүүлчийн өдөр Токиогийн Хибия дүүрэг дэх кино наадам болж буй газарт уралдааны ангиллуудын ялагчдыг зарласан байна. Палестины кино найруулагч Аннемари Жасирын “Палестин 36” кинонд 1936 онд Британийн колоничлолын эсрэг Палестины арабчуудын бослогын тухай түүхийг өгүүлжээ.
А.Жасир нэр хүндтэй шагналыг хүртсэндээ баяртай байгаагаа дүрс бичлэгээр дамжуулан илэрхийлсэн байна. Тэрбээр хэлэхдээ, энэхүү шагнал бол агуу том хүндэтгэл бөгөөд манай киноны багийнхан, миний хувьд болон шаргуу хөдөлмөрлөсөн бүх хүний хувьд нэр төрийн хэрэг болж хэмээн сэтгэгдлээ хуваалцжээ.
Эх сурвалж: NHK
