Засгийн газрын хэрэгжүүлэгч агентлаг Соёл, урлагийн газраас энэ сард тохиож буй түүхэн өдрүүдийн ач холбогдол, үнэ цэн, бахархалт хүмүүсийн бүтээл туурвил, бүтээлч сэтгэлгээг үндэсний хэмжээнд иргэд, олон нийт, хүүхэд залуучуудад таниулах, сурталчлах зорилгоор 2025 оны 11 дүгээр сарыг “Монгол бахархал” уриан дор бүтээлч сарын аян болгон тэмдэглэж улс, бүс, орон нутаг, байгууллагын түвшинд хэрэгжүүлж ажиллах чиглэлийг төрийн болон орон нутгийн өмчийн соёл урлагийн байгууллагуудад хүргүүлжээ.
Монголчуудын эх хэл, түүх, соёл, оюун санааны дархлааг бэхжүүлэх, монгол бахархлыг бэхжүүлэхэд үнэтэй хувь нэмэр оруулсан түүхэн хүмүүсийн мэндэлсэн өдөр, түүхэн үйл явдлууд тохиосон чухал ач холбогдолтой цаг хугацаа 2025 он болон энэ оны 11 дүгээр сард тохиож буй юм. Тухайлбал,
Их эзэн Чингис хаан-Тэмүүжин мэндэлсэн огноог билгийн тооллын гуравдугаар жарны усан морин жил буюу 1162 оны өвлийн тэргүүн сарын шинийн нэгний өдөр хэмээн тогтоож, Их хааны мэндэлсэн өдрийг “Монгол бахархлын өдөр” хэмээн нэрийдэх Монгол Улсын Ерөнхийлөгчийн зарлиг гаргасан бөгөөд энэ оны 11 дүгээр сарын 21-ний өдөр бүх нийтээр ёслон тэмдэглэнэ.
Өдгөөгөөс нэгэн зууны тэртээ 11 дүгээр сарын 26-ны өдөр Монголчууд дэлхий дахинаа Бүгд Найрамдах улсаа тунхаглаж анхдугаар Үндсэн хуулиа баталж, хамжлагат ёсыг халан, үндэсний ардчилсан өөрчлөлт, улс төрийн цоо шинэ тогтолцоог хуульчлан баталгаажуулсан бөгөөд энэ оны мөн өдөр "Улс тунхагласны баяр"-ын өдрийг бүх нийтээр тэмдэглэнэ.
Монгол Улсын Засгийн газрын 2025 оны 183 дугаар тогтоолоор Монголын төр, шашин, соёлын нэрт зүтгэлтэн Өндөр гэгээн Г.Занабазарын мэндэлсний 390 жилийн ойг, Засгийн газрын 2025 оны 67 дугаар тогтоолоор Монгол Улсын Төрийн шагналт, төр, нийгмийн нэрт зүтгэлтэн, академич Бямбын Ринчений мэндэлсний 120 жилийн ойг тус тус 2025 онд тэмдэглэх шийдвэр гарч ойг зохион байгуулах ажлууд үргэлжилж байна.
Энэхүү бүтээлч сарын хүрээнд улсын хэмжээнд:
-Соёл, уламжлал, түүхээ хүндэтгэх сэтгэлгээг төлөвшүүлэх,
-Үндэсний хэл, бичгийн хэрэглээг нэмэгдүүлэх, үнэ цэнийг таниулах,
-Төр, нийгмийн зүтгэлтнүүдийн бүтээл туурвил, үзэл санааг түгээн дэлгэрүүлэх,
-Монгол Улсын Үндсэн хуулийн үзэл санааг сурталчлах, тусгаар тогтнолын үнэ цэн, эрх зүйт соёлын ухамсрыг бэхжүүлэх чиглэлээр дараах өргөн хүрээтэй үйл ажиллагаа зохион байгуулах юм. Мөн үзэсгэлэн, сургалт, лекц, хэлэлцүүлэг, эрдэм шинжилгээний хурал, боловсролын хөтөлбөрүүд, урлагийн тоглолт, телевиз, радиогийн уран сайхны нийтлэл, нэвтрүүлэг, танин мэдэхүйн цахим контентууд олон нийтийн хүртээл болно.
