Версалийн ордны Хааны дуурийн театрын тайзнаа Францын жүжгийн зохиолч Мольерын (1622-1673) хэв маягаар хиймэл оюун (AI) зохиолыг нь бичсэн жүжгийг ирэх онд тавина гэж "Agence France-Presse" (AFP) агентлаг мэдээлжээ. 

Уг бүтээлийг туурвиж байгаа бөгөөд 2026 оны тавдугаар сард нээлтээ хийх ажээ. Жүжгийг “Одон орны зурхайч ба Худал мэргэ” гэж нэрлэсэн байна. Уг жүжигт нэгэн зурхайч эцэг охиндоо дурлаагүй хүнтэйгээ гэрлэвэл аз жаргал, эд хөрөнгө ирнэ гэж мэргэлдэг тухай өгүүлнэ. Харин тэдний гэрийн үйлчлэгч гэрлэлтэд саад хийхийг оролдоно.

“Энэ бол Мольер өлхөн биччих байсан жүжгийн зохиол юм. Бидний мэдэж байгаагаар Мольер одон орны зурхай сонирхдог байсан” хэмээн энэ төслийг дэмжин ажиллаж буй Сорбонны их сургуулийн дэд захирал Пьер-Мари Шовен ярьжээ. 

Жүжгийн зохиолыг Францын “Mistral” гэдэг гарааны компанид бүтээсэн хиймэл оюуны загвар бичиж байгаа ажээ. Уг загварыг Мольер болон XVII зууны үеийн бусад зохиолчдын бүтээл дээр тулгуурлан сургасан байна. Жүжгийн хэл найруулга XVII зууны хэв маягт нийцэж байгаа эсэх, мөн үйл явдлынх нь логик дарааллыг мэргэжлийн шинжээчдийн комисс шалгах гэнэ. "Бидний зорилго бол хиймэл оюун нь хүний бүтээлч чадварыг дээшлүүлэх хэрэгсэл болох боломжтойг харуулах явдал юм" гэж Шовин онцолжээ. Тайзны чимэглэл, хувцасны загварыг гаргахыг тулд хиймэл оюуныг мөн тухайн үеийн уран зураг, зургууд дээр тулгуурлан сургасан байна. 

Жүжгийг фарс буюу дундад зууны үеийн инээдмийн жүжгийн жанраар тавих бөгөөд долоон жүжигчин, гурван хөгжимчин оролцох ажээ. Версальд нээлтээ хийсний дараа уг жүжгийг бусад теартын тайзнаа тоглоно.

Эх сурвалж: AFP