“Тэрбум мод” үндэсний хөдөлгөөний хүрээнд Хөвсгөл аймгийн Мөрөн суманд ногоон байгууламжийг нэмэгдүүлэх, экологийн тэнцвэрт байдлыг хангах зорилгоор ойн зурвас байгуулах ажил эхэлж байна.

Тус ойн зурвасыг Мөрөн сумын зүүн захаас угтах хаалганы дагуу 5 км урттай, 5200 гаруй мод тарьж байгуулахаар төлөвлөсөн бөгөөд ажлыг мэргэжлийн ойн байгууллага хариуцан гүйцэтгэх юм.

Модны хамгаалалт, усалгаа, арчилгааны зардлыг бүрэн шийдвэрлэж, энэ ажлыг Дэлгэрмөрөн сум дундын ойн анги хариуцан хэрэгжүүлэхээр болсон байна.

Ойн зурвас байгуулагдсанаар Хөвсгөл нутгийг зорин ирж буй дотоод, гадаадын жуулчид, аялагчид ногоон зурвас дундуур зорчин, Мөрөн хотод нэвтрэх боломжтой болж, байгаль орчны өнгө үзэмж нэмэгдэх юм.

Цаашид Хөвсгөл аймаг “ногоон аймаг” болох зорилт дэвшүүлж, мод тарих ажлыг шат дараатайгаар эрчимжүүлэх, үр дүнтэй, тогтвортой үйл ажиллагаа явуулах чиглэлд анхаарч ажиллаж байна.

Эх сурвалж: Хөвсгөл аймгийн ЗДТГ