Нийслэлийн авто замын ачааллыг бууруулах зорилгоор барьж буй Зайсангийн зүүн гүүрийн бүтээн байгуулалтын ажил 82 хувийн гүйцэтгэлтэй үргэлжилж байна. Уг төсөл нь нийт 225 метр урттай төмөр бетон гүүр шинээр барих бөгөөд одоогоор суурийн арматур, дам нуруу байрлуулах, газрын түвшнээс доош 17 метрийн гүнд шон суурилуулах зэрэг доод бүтээцийн ажил 98 хувьтай дуусжээ.
Дээд бүтээцийн ажилд нийт 10 алгасал угсрах хуваарьтай бөгөөд одоогоор таван байршилд алгасал, холбоос төмөр бетон арматурын угсралт хийгдэж байна. Энэ нь гүүрийн бүтцийг холбох, ачаалал даах чадамжийг бүрдүүлэх чухал үе шат юм.
Зайсангийн гүүрийн бүтээн байгуулалтыг үндэсний бүтээн байгуулагч “ЗМЗ” компани дангаар гүйцэтгэж байгаа бөгөөд барилгын талбайд 20 гаруй техник хэрэгсэлтэй, 35 инженер, техникийн ажилтан ажиллаж байгаа талаар албаныхан мэдээлжээ.
Гүүрийг 2025 оны зургадугаар сард багтаан ашиглалтад оруулахаар төлөвлөсөн бөгөөд ажлын явц төлөвлөгөөний дагуу үргэлжилж байгааг Нийслэлийн Замын хөгжлийн газар мэдээллээ.
Эх сурвалж: Нийслэлийн Замын хөгжлийн газар
