Дорноговь аймагт нар, салхины эрчим хүчний нийлбэр хүчин чадал 130 мегаваттад хүрэх сэргээгдэх эрчим хүчний дөрвөн томоохон төсөл хэрэгжиж байна. Эдгээр төсөл нь Монгол Улсын сэргээгдэх эрчим хүчний салбарт бодит үр дүн үзүүлж, байгаль орчны ачааллыг бууруулахад чухал хувь нэмэр оруулж байгаа юм.

Замын-Үүд суманд Японы “Шигемицү Шожи”, “Шарп корпораци” болон Монголын “Эрчим тээг” компанийн хөрөнгө оруулалттай 15 МВт-ын хүчин чадалтай “Гэгээн” нарны цахилгаан станц, мөн өнгөрсөн онд ашиглалтад орсон “Эрдэнэ” нарны станц хоёр нийлээд 30 МВт-ын хүчин чадалтай үйл ажиллагаа явуулж байна. Түүнчлэн Сайншанд сумын нутагт “Дезерт солар пауэр вуан” ХХК-ийн “Говь нарны цахилгаан станц” 30 МВт-ын хүчин чадалтайгаар ажиллаж байгаа бол “Сайншанд салхин парк” ХХК-ийн 55 МВт-ын хүчин чадалтай салхин цахилгаан станц сэргээгдэх эрчим хүч үйлдвэрлэж буй.

Эдгээр дөрвөн станц жилд дунджаар 312.3 сая киловатт цаг эрчим хүч үйлдвэрлэж төвийн эрчим хүчний системд нийлүүлдэг. Ингэснээр жил бүр 1.29 сая тонн хүлэмжийн хий болох нүүрс хүчлийн хийг агаар мандалд гаргахаас сэргийлж, 6.46 сая тонн цэвэр усны хэрэглээг хэмнэж, 732 мянган тонн нүүрсний хэрэглээг бууруулах боломжтой болжээ.

Монгол Улс “Алсын хараа–2050” бодлогын баримт бичигтээ хүлэмжийн хийн ялгарлыг 2030 он гэхэд 22.7 хувиар бууруулах зорилт дэвшүүлсэн бөгөөд дээрх төслүүд нь энэ зорилтын хэрэгжилтэд шууд дэмжлэг болж байгааг холбогдох албаныхан онцолж байна.

Эх сурвалж: Дорноговь аймгийн ЗДТГ, Эрчим хүчний яам