-Танд энэ өдрийн мэндийг хүргэе. Сэлэнгэ аймгийн нийтийн номын санд нэн эртний болоод ховор ном зохиол бий юу. Энэ талаар мэдээлэл өгөхгүй юу?

-Сэлэнгэ аймгийн Нийтийн номын санд өнөөдрийн байдлаар Францын алдарт зохиолч Жюль Верний зохиол хүүхдийн адал явдалт “Арван таван наст капитан” ном уйгуржин монгол бичгээр анх гарч байсан хэвээрээ хадгалагдаж байна. Энэхүү номыг Улсын хэвлэлийн газраас 1968 онд хэвлэн гаргасан байдаг.   

Мөн Монголчуудын эртнээс тахиж шүтэж, эрхэмлэж дээдэлж ирсэн хөлгөн судар гэгддэг Жадамба судар бий. Энэ судрыг модон бараар барлаж бичсэн байгаа. Уг судрыг жинхэнэ буюу хуулбарласан эсэхийг шинжилж судлуулахаар мэдээллийг нь Соёлын өвийн төв рүү хүсэлт илгээсэн байгаа.

Жадамба судар Ганжуурын хамгийн эхний боть буюу билиг барамидын аймагт багтдаг Шагжаан чадагч Бурхан багшийн айлдсан хоосон чанарын тухай номлодог монголоор “Найман мянгат” нэрт судар юм.

Энэ судар байгаа орон газарт өвчин зовлон, муу зүйлс оршдоггүй хэмээн Монголчууд дээр үеэс гэр орон, сүм хийддээ шүтээн болгон залж байсан уламжлалтай юм.

Мөн манайд 5 зүйлийн үсгээр хавсаргасан манж хэлний 3 боть тайлбал толь бичиг хадгалагдаж байна.

Түүнчлэн Төр нийгмийн нэрт зүтгэлтэн, судлаач Ж.Самбуу агсны 1944 онд хэвлүүлж байсан “Мал аж ахуй дээрээ яаж ажиллах тухай ардад өгөх сануулга сургаал” ном монгол бичгээр хэвлэгдсэнээрээ хадгалагдаж байгаа. Уг ном нь нүүдлийн бэлчээрийн аж ахуйд түшиглэн бичсэн бүтээл.

Нэн эртний болон ховор ном зохиолыг дотор нь хосгүй үнэт ховор, нэн ховор, ховор гэж ангилдаг. Хосгүй үнэт ховор төрөлд алт, мөнгөөр урлаж бүтээсэн нэн эртний бүтээл ордог.