БСШУ-ны сайд асан, Элчин сайд асан Ё.Отгонбаярын сүүлд суусан эхнэрийн хамаарал бүхий компани Хөгжлийн банкнаас 17,7 тэрбум төгрөгийн зээл аваад, эргүүлж төлөөгүй гэх мэдээллийг сэтгүүлчид нийтэд мэдээлсэн. 

Гэтэл сайд асан Ё.Отгонбаяр тухайн мэдээллийг ил болгосон сэтгүүлчдийг өөрийн твиттер хуудсаараа дамжуулж, “ална” хэмээн сүрдүүлсэн нь олонд ил болоод байгаа. 

Тодруулбал, тэрээр сэтгүүлч У.Оргилмаад хандаж, “Чамайг олж алнаа. Миний амьдралыг алсан бол хариугаа авна” хэмээжээ. Харин сэтгүүлч У.Оргилмаа амь насанд нь заналхийлсэн Ё.Отгонбаярын тус үйлдлийг шалгуулахаар Эрүүгийн цагдаагийн газарт хандсан байна. 

Мөн Монголын сэтгүүлчдийн нэгдсэн эвлэлээс мэдэгдэл гаргаж, түүний энэ үйлдлийг гэмт хэргийн шинжтэй байж болзошгүй гэж үзэж байгаагаа мэдэгдээд буй. Түүнчлэн Сэтгүүлчдийн амь насанд заналхийлсэн асуудлаар сэтгүүлчид нэгдэж өнөөдөр 14:00 цагт хэвлэлийн бага хурал хийхээр болоод байна. 

Нийтэд цацагдсан энэхүү мэдээллүүд иргэдийн бухимдлыг ихээхэн төрүүлж, төрийн өндөр албан тушаал хашиж байсан хүний энэ уйваагүй үйлдийг хатуу шүүмжилж байна. 

Тэгвэл өнөөдөр Ё.Отгонбаяр өөрийн твиттер хуудсаараа дамжуулж, "Өчигдөр би бухимдахдаа ёс зүйгүй үг хэрэглэжээ. Иймд зүй бус үг хэрэглэсэндээ харамсаж байна. Албан ёсоор сэтгүүлч У.Оргилмаа, Н.Өнөрцэцэг нараас уучлалт гуйж байгааг минь хүлээн авна уу” хэмээжээ. 

Харин үүний хариуд Сэтгүүлч Н.Өнөрцэцэг "Эхнэрийн хувь эзэмшдэг компаниараа Хөгжлийн банкнаас авсан 17,7 тэрбум төгрөгөө төлчих. Улсыг хохиролгүй болгочих. Наад мөнгө чинь тэр чигтээ эргээд төлөх зээл. 17 тэрбум аймар их, бүр асар их мөнгө шүү. Тэгвэл УУЧЛАЯ. Алахаа больсонд баярлалаа" хэмээн жиргэжээ.

Мөн Сэтгүүлч У.Оргилмаа "Би таныг уучлах юм уу? Та намайг алахаа больж уучилж байгаа юм уу? Ойлгохгүй байна. Энэ бол ёс зүйгүй үг хэрэглэх биш "заналхийлэл"-д тооцогдох учраас хуулийн байгууллагаар шийдүүлнэ" гэжээ.