2021 оны Элсэлтийн ерөнхий шалгалт маргааш Монгол Улсын түүх хичээлийн шалгалтаар эхэлнэ. Шалгалтыг Наймдугаар сарын 19-22-ний хооронд зохион байгуулна.
Нийслэлийн Мэргэжлийн хяналтын газраас ЭЕШ-ын бэлтгэл ажилд цар тахлаас урьдчилан сэргийлэх ажилд хяналт шалгалтыг хийжээ.
Энэ талаар НМХГ-ын Эрүүл мэндийн хяналтын хэлтсийн дарга Д.Цэнд-Аюуш мэдээлэл өглөө.
Тэрээр "Шалгалтын төвүүдэд хяналт шалгалт хийхэд нэр бүхий сургуулиуд анги танхимд цэвэрлэгээ хийж, мэргэжлийн байгууллагаар халдваргүйтгэл хийлгэсэн байна.
Шалгалтын төвийн нэг ангид 10-15 шалгуулагч хоорондоо 1.5-2 метр зайтай суух боломжийг бүрдүүлсэн. Мөн сэжигтэй тохиолдол илэрвэл тусгаарлах өрөөнд оруулж, шалгалтыг үргэлжлүүлэх боломжийг хангаж, хаягжуулсан байна.
Нийслэлийн Мэргэжлийн хяналтын газраас хяналт шалгалтын явцад шалгалтын төв болох 41 сургуульд зөвлөн туслах чиглэлийн үйлчилгээ үзүүлсэн.
Түүнчлэн шалгуулагчийн биеийн халууныг үзэхэд 37-оос дээш хэм байвал мэдээллийг нь бүртгэн, тусгаарлах өрөөнд оруулж, ЭЕШ өгөх боломжийг олгоно" гэлээ.
